Икки ойда миллиондан ошди: ўзбекистонликлар қаерга сафар қилмоқда?
2026 йил бошиданоқ ўзбекистонликлар саёҳатга жиддий киришиб кетгани кўриниб турибди. Январь–февраль ойларида мамлакат фуқароларидан 1 миллиондан ортиқ киши туристик мақсадларда хорижга чиққан.
Миллий статистика қўмитаси маълумотига кўра, жами 1 081 612 нафар ўзбекистонлик чет элга сафар қилган. Бу эса ўтган йилнинг шу даврига нисбатан қарийб 50 минг нафарга кўп дегани. Демак, саёҳатга қизиқиш йилдан-йилга ўсаяпти — тренд аниқ.
Энг қизиғи, ўзбекистонликлар узоқ эмас, асосан қўшни ва яқин давлатларни танлашда давом этмоқда. Бу ҳам вақт, ҳам харажатни тежайди — ақлли ход.
2026 йилнинг дастлабки икки ойида энг кўп борилган давлатлар:
• Қирғиз Республикаси — 426 421 нафар
• Тожикистон — 179 390 нафар
• Қозоғистон — 166 017 нафар
• Саудия Арабистони — 115 350 нафар
• Россия — 62 054 нафар
• Туркия — 34 634 нафар
• БАА — 26 449 нафар
• Таиланд — 10 946 нафар
• Хитой — 8 890 нафар
• Миср — 8 872 нафар
Кўриниб турибдики, Марказий Осиё давлатлари ҳали-ҳамон топ-танлов. Шу билан бирга, Саудия Арабистонига сафарлар сони юқори экани — умра ва диний саёҳатларга талаб кучли эканини кўрсатади.