Бугун “метан” заправкалари фақат ижтимоий соҳа ва жамоат транспортига хизмат қилади
Энергетика вазирлиги маълум қилишича, магистраль газ қувурларида босимни ростлаш ва уни меъёрий даражага келтириш ишлари давом этмоқда. Шу сабабли айрим ҳудудларда табиий газ таъминотини барқарор сақлаш бўйича вақтинчалик чоралар кўрилмоқда.
Мутасаддиларнинг таъкидлашича, газ босимининг пастлиги шароитида биринчи навбатда аҳоли хонадонлари ҳамда ижтимоий соҳа объектларини узлуксиз газ билан таъминлаш устувор вазифа ҳисобланади.
Шу боис бугун метан ёқилғи қуйиш шохобчалари асосан ижтимоий соҳа объектларига хизмат кўрсатувчи транспорт воситалари ва жамоат транспортлари учун фаолият юритади. Бу чоралар газ таъминотини барқарорлаштириш ва муҳим объектларни узлуксиз ишлашини таъминлашга қаратилган.
Шунингдек, биржа савдоларига чиқарилаётган автобензин ҳамда суюлтирилган газ (пропан) ҳажми оширилгани маълум қилинди. Мутасаддилар хусусий ёқилғи қуйиш шохобчалари эгаларини нархларни сунъий равишда оширмасликка чақириб, нархлар устидан назорат кучайтирилганини таъкидлади.