Ким Чен Ин қизи билан мудофаа заводига ташриф буюрди
Шимолий Корея раҳбари Ким Чен Ин қизи билан биргаликда мамлакатдаги ҳарбий саноат корхоналаридан бирига ташриф буюрди. Сафар давомида улар кичик қуроллар ишлаб чиқаришга ихтисослашган мудофаа заводи фаолияти билан яқиндан танишди.
Маълум қилинишича, ташриф чоғида давлат раҳбари заводда ишлаб чиқарилаётган янги турдаги тўппонча намуналарини ҳам кўздан кечирди. Шунингдек, Ким Чен Ин ва унинг қизи корхона мутахассислари иштирокида мазкур қуролни синовдан ўтказишди.
Шимолий Корея раҳбари корхонада ишлаб чиқариш жараёни, қуролларнинг техник имкониятлари ва уларнинг армия учун аҳамияти ҳақида маълумот олди. Айтилишича, заводда замонавий технологиялардан фойдаланган ҳолда кичик ўқотар қуроллар ишлаб чиқариш йўлга қўйилган.
Кузатувчиларнинг фикрича, Ким Чен Иннинг бундай ташрифлари мамлакат мудофаа салоҳиятини намойиш этишга қаратилган. Сўнгги вақтларда Пхенян раҳбарияти ҳарбий саноатни янада ривожлантириш ва қурол-яроғ ишлаб чиқариш ҳажмини оширишга алоҳида эътибор қаратаётгани таъкидланмоқда.