АҚШдан яна 72 нафар ўзбекистонлик депортация қилинди
11 март куни АҚШдан Ўзбекистонга махсус авиарейс билан 72 нафар юртдошимиз олиб келинди. Бу ҳақда Америка Қўшма Штатларининг Ўзбекистондаги дипломатик ваколатхонаси хабар тарқатди.
Расмий маълумотда айтилишича, ушбу фуқаролар АҚШ ҳудудида қонуний асосда яшаш ҳуқуқига эга бўлмагани учун мамлакатдан чиқарилган. Уларни юртига қайтариш ишлари махсус ташкил этилган рейс орқали амалга оширилган.
Элчихона қайд этишича, мазкур тадбир АҚШ томонидан ноқонуний миграцияга қарши кўрилаётган чоралар доирасидаги навбатдаги амалий қадамлардан бири ҳисобланади. Шу орқали миграция қоидаларини бузган шахсларни аниқлаш ва уларни мамлакатдан чиқариш сиёсати изчил давом эттирилаётгани билдирилган.
Шунингдек, баёнотда Дональд Трамп президентлик лавозимига киришганидан буён 1000 нафардан зиёд Ўзбекистон фуқароси АҚШдан депортация қилингани ҳам келтирилган. Бу рақам сўнгги даврда миграция қонунчилигига нисбатан талаблар янада кучайтирилганини кўрсатади.
Баёнот якунида АҚШ ҳудудига ноқонуний равишда кирган ёки мамлакатда қонуний мақомсиз яшаб турган шахслар қамоқ жазоси ҳамда мажбурий чиқариб юборилиш каби оқибатларга дуч келиши мумкинлиги эслатилган. Шу билан бирга, депортация жараёнларида ҳамкорлик кўрсатгани учун Ўзбекистон ҳукуматига алоҳида миннатдорлик изҳор этилган.