Forbes дунёнинг энг бой бешлигини маълум қилди
Forbes дунёнинг энг бой инсонлари бўйича навбатдаги рейтингини эълон қилди. Унга кўра, тадбиркор Илoн Маск кетма-кет иккинчи йил ҳам рўйхатда биринчи ўринни сақлаб қолди.
Tesla, SpaceX компаниялари асосчиси, шунингдек X ижтимоий тармоғи эгаси бўлган Маскнинг бойлиги 839 миллиард долларга етган. Унинг сармояси, айниқса, xAI стартапига киритилган инвестициялар ҳамда SpaceX компаниясининг муваффақиятлари ҳисобидан сезиларли даражада ошган.
Рейтингда иккинчи ўринни Google ҳаммуассиси Ларри Пейж 257 миллиард доллар бойлик билан эгаллади. Учинчи поғонадан эса Google’нинг яна бир асосчиси Сергей Брин 237 млрд доллар билан жой олган. Кейинги ўринларда Amazon асосчиси Жефф Безос 224 миллиард доллар билан тўртинчи, Meta эгаси Марк Цукерберг эса 222 миллиард доллар билан бешинчи ўринни банд этган.
Маълум қилинишича, бу йилги рўйхатга жами 3428 нафар миллиардер киритилган бўлиб, бу ўтган йилга нисбатан 400 нафарга кўп. Улар умумий ҳисобда 20,1 триллион доллар бойликка эгалик қилади. Биринчи ўнликдаги миллиардерларнинг жами сармояси эса 2,6 триллион доллар деб баҳоланган.
Мутахассислар таъкидлашича, SpaceX компанияси яқин йилларда акцияларини оммавий савдога чиқаришни режалаштирмоқда. Агар бу жараён муваффақиятли амалга ошса, Илoн Маск бойлиги янада ортиб, у тарихда 1 триллион доллар сармояга эга бўлган илк инсонга айланиши мумкин.