Пезешкиан: Эронни йўқ қилиш ҳақидаги ўйлар — хом хаёл
Эрон президенти Масуд Пезешкиан мамлакат тарихи ва унинг мустаҳкамлиги ҳақида кескин баёнот берди. Унинг таъкидлашича, Эронни йўқ қилиш ҳақида ўйлаётганлар тарихни етарлича билмайди.
Президентнинг сўзларига кўра, Эрон камида 6000 йиллик цивилизацияга эга давлат ҳисобланади. Бу юрт асрлар давомида турли синовлар, урушлар ва босқинларни бошдан кечирган. Бироқ шунча тарихий бўронларга қарамай, ҳеч бир куч бу қадимий номни йўқ қилиб юборишга муваффақ бўлмаган.
Пезешкианнинг таъкидлашича, Эронни вайрон қилиш ҳақида ўйлаётганлар амалда тарихий ҳақиқатни инкор этмоқда. Унинг фикрича, бу каби даъволар асоссиз тасаввур ва хом хаёлдан бошқа нарса эмас.
Давлат раҳбари тарихга назар ташлаб, бир муҳим ҳақиқатни эслатди: асрлар давомида турли босқинчилар бу ҳудудга келган, аммо уларнинг барчаси вақт ўтиши билан тарих саҳнасидан чиқиб кетган. Эрон эса ўз ўрнида қолган ва бугун ҳам мавжудлигини сақлаб келмоқда.
Президентнинг сўзларига кўра, бу юртнинг кучи унинг чуқур тарихи, маданияти ва цивилизацион меросида мужассам. Шу боис Эронни йўқ қилиш ҳақида гапираётганлар, аввало, ўтмиш сабоқларини англаб етиши керак.