Криштиану Роналду яна бир йирик бизнес лойиҳага сармоя киритди
Криштиану Роналду бу сафар футбол майдонидан ташқаридаги фаолияти билан яна диққат марказига тушди. Португалиялик суперюлдуз Pro2col Software компаниясининг 10 фоиз улушини 7,5 миллион доллар эвазига харид қилиб, компания ҳаммулкдорларидан бирига айланди.
Маълум қилинишича, ушбу компания Herbalife корпорациясининг шўба тузилмаси ҳисобланади. Шу тариқа, Роналду ўз инвестиция портфелини янада кенгайтириб, технология ва саломатлик йўналишидаги лойиҳаларга ҳам жиддий эътибор қаратаётганини кўрсатди.
Футболчининг айтишича, бу лойиҳа одамларнинг ўз соғлиғига бўлган муносабатини ўзгартиришга хизмат қилиши мумкин. У мазкур платформа инсонларни саломатликка бошқача нигоҳ билан қарашга ундашини таъкидлаган.
Шундай қилиб, Криштиану Роналду нафақат спортдаги натижалари, балки бизнес ва сармоя йўналишидаги қарорлари билан ҳам фаол бўлиб қолмоқда. Унинг янги инвестицияси спорт юлдузининг тадбиркорлик соҳасида ҳам катта мақсадлари борлигини кўрсатмоқда.