Трамп ҳар доим яҳудий халқига хизмат қилишини айтди

7 март куни омма олдидаги чиқишида АҚШ президенти Доналд Трамп ўзини яҳудий халқининг доимий дўсти сифатида кўрсатиб, бу йўналишда қатъий позицияда эканини айтгани ҳақида хабарлар тарқалди. Унинг чиқишида Конгресс ва ҳукумат ичида бу мавзу бўйича турлича қарашлар борлиги, бироқ ўзи “фикри аниқ” экани урғулангани қайд этилади.

"Мен ҳар доим яҳудий халқига хизмат қиламан," - деди Трамп.

Шу фон ортида Трампнинг Яқин Шарқдаги можаро бўйича сўнгги баёнотлари ҳам кескин тус олмоқда. Бир кун аввал у Эрондан “сўзсиз таслим бўлиш”ни талаб қилганини айтган ва таслим бўлиш ҳамда “мақбул етакчилик” масаласи ҳал бўлгач, Вашингтон Теҳронни “ҳалокат ёқасидан” қайтариш, иқтисодини тиклашга ёрдам беришини билдирган.

Яна бир шов-шувли нуқта — Оқ уй раҳбарининг қуруқликдаги операция эҳтимолини ҳам истисно қилмагани ҳақидаги хабарлар. TIME нашрига кўра, Трамп интервьюда АҚШ қўшинларини Эрон ҳудудига юбориш масаласини “зарурат бўлса” кўриб чиқиши мумкинлигини айтган.

Қисқаси, риторика икки йўналишда бир вақтнинг ўзида қаттиқлашяпти: ички аудиторияга — “мен позициямдан қайтмайман” деган сигнал, ташқи майдонга эса — “талабим қаттиқ, босим давом этади” деган чақириқ. Бу эса келаси кунларда ҳам дипломатик манёврлар эмас, аксинча, баёнотлар урушининг янада авж олишини кўрсатиши мумкин.