Қашқадарёда Damas машинаси газ баллони портлади
Қашқадарё вилоятининг Косон туманида фавқулодда ҳолат юз берди. Бугун соат 10:30 атрофида Янгиобод маҳалласида тўхтаб турган Damas русумли автомобилнинг газ баллони тўсатдан портлаб кетди. Ҳодиса акс этган видеолар ижтимоий тармоқларда кенг тарқалиб, жамоатчилик орасида хавотир уйғотди.
Фавқулодда вазиятлар вазирлиги маълумотларига кўра, портлашга автомобилга ўрнатилган газ баллонининг техник носозлиги сабаб бўлган. Видеолавҳаларда баллон бўлаклари портлаш кучи билан атрофдаги бошқа транспорт воситалари устига сочилиб кетганини кўриш мумкин. Бахтли тасодиф туфайли ушбу ҳодиса оқибатида ҳеч ким тан жароҳати олмаган ва ёнғин келиб чиқмаган.
Ҳозирги вақтда мутахассислар томонидан воқеа жойи кўздан кечирилиб, етказилган моддий зарар миқдори аниқланмоқда. Шунингдек, техник носозликка нима сабаб бўлгани ва баллон қачон охирги марта текширувдан ўтгани юзасидан суриштирув ишлари олиб борилмоқда. Ҳайдовчилардан ўз транспорт воситаларидаги газ ускуналарини ўз вақтида ва сифатли техник кўрикдан ўтказишни сўраймиз.