Гулистонда 17 млн сўм қарзни "ўчириб бераман" деган мутахассис ушланди

Гулистон шаҳрида тадбиркорнинг сув таъминоти бўйича 17 млн сўмлик қарздорлигини “йўқ қилиб бераман” дея ваъда берган мутахассис қўлга олинди. Ҳолат тадбиркорлик субъектларининг ҳуқуқларини ҳимоя қилиш доирасида ўтказилган тезкор тадбир жараёнида фош этилди.

Маълум қилинишича, Бош прокуратура ҳузуридаги Департаментнинг Гулистон шаҳри бўлими ходимлари ўтказган тадбирда “С.И.Т.” МЧЖнинг бўлим мутахассиси Э.В. якка тартибдаги тадбиркор А.Р.нинг ишлаб чиқариш цехида сув таъминотидан йиғилиб қолган 17 млн сўм қарзни “бекор қилиб бериш”, қўшимча равишда янги ҳисоблагич ўрнатишни ваъда қилган.

Айтилишича, у бу “масалани ҳал қилиб бериш” эвазига МЧЖ ходими Қ.Ж. орқали 4,5 млн сўм пул маблағини олган пайтида ашёвий далиллар билан ушланган.

Ҳуқуқни муҳофаза қилувчи идоралар маълумотига кўра, мазкур ҳолат юзасидан Жиноят кодексининг 168-моддаси (фирибгарлик) ҳамда 28 ва 211-моддалари (пора бериш билан боғлиқ нормалар) асосида жиноят иши қўзғатилган. Ҳозирда иш доирасида тергов ҳаракатлари олиб борилмоқда.

Бу каби ҳолатлар тадбиркорлар учун яна бир огоҳлик: “қарзни ўчириб берамиз”, “ҳисоблагични осон ҳал қиламиз” деган ваъдалар қанчалик ширин туюлмасин, қонуний йўлдан чиқиш охирида муаммони янада катталаштириши мумкин.