Санкцияларга қарамай хорижий автомобиллар Россияга кирмоқда
Reuters агентлиги маълумотларига кўра, Ғарб давлатлари жорий этган санкцияларга қарамасдан, хорижий ишлаб чиқарилган автомобиллар Хитой орқали Россия бозорига кириб келишда давом этмоқда.
Хабарда қайд этилишича, BMW ҳамда қатор йирик автомобил ишлаб чиқарувчи компаниялар Россияга тўғридан-тўғри автомобил етказиб беришни расман тўхтатган. Бироқ, шунга қарамай, мазкур транспорт воситалари турли воситачи компаниялар орқали Россиядаги дилерларга етказиб берилмоқда.
Агентлик таъкидлашича, бундай айланма йўл орқали амалга оширилаётган импорт ҳажми йилдан-йилга ошиб бормоқда. Хусусан, 2025 йил давомида Россияда сотилган хорижий автомобилларнинг қарийб ярми айнан Хитой орқали олиб кирилгани маълум қилинган.
Мутахассислар фикрига кўра, бу ҳолат Хитойнинг халқаро савдо ва логистика тизимидаги мавқеи тобора мустаҳкамланаётганини кўрсатмоқда. Шунингдек, амалдаги санкциялар шароитида компаниялар ва бозор иштирокчилари томонидан муқобил таъминот йўллари ва янги логистик занжирлар шакллантирилаётганидан далолат беради.