Африка Миллатлари Кубоги соврини Сенегалда қамоқхонагача борди

Африка Миллатлари Кубоги соврини Сенегал бўйлаб сафарини давом эттиряпти — ва бу саёҳат оддий “парад” эмас, ҳақиқий сюжетли турне бўляпти. Кубокнинг навбатдаги манзили эса кўпчилик кутмаган жойга тўғри келди: Дакар шаҳридаги мамлакатдаги энг йирик ва энг гавжум жазо муассасаси — Ребейсс қамоқхонаси.

Ташрифдан мақсад, ташкилотчилар айтишича, совринни “ҳамма учун яқин” қилиш, миллий ғурур ва бирдамлик ҳиссини кенгроқ қатламга етказиш бўлган. Шу сабаб маҳбуслар қитъадаги энг нуфузли совринни нафақат кўз билан кўриш, балки унга қўл теккизиш имкониятига ҳам эга бўлишди. Бу ташаббус Сенегал футбол федерацияси кўмагида амалга оширилгани айтилмоқда.

Бироқ бу қарор жамиятда турли реакцияларга сабаб бўлди. Ижтимоий тармоқларда Ребейсс қамоқхонасидан олинган видео ва суратлар тезда тарқалди: кадрларда кубок маҳбусларга яқинлаштирилаётгани, айримлари эса панжара ортидан қўл чўзиб, совринга етишга урингани акс этган. Қисқаси, “трофей-тур” бу сафар одамларни ҳайратга солди — кимдир буни инсонпарвар қадам дейди, кимдир эса “бу қаергача борди?” деб қабул қилди.

Эслатиб ўтамиз, январь ойида Сенегал терма жамоаси финалда Марокашни 1:0 ҳисобида мағлуб этиб, Африка Миллатлари Кубогини қўлга киритган эди. Шу ғалабадан кейин “Теранга шерлари”га топширилган соврин мамлакат бўйлаб миллий ифтихор рамзи сифатида турли ҳудудларга олиб чиқилмоқда.

Бир нарса аниқ: бу кубок Сенегалда шунчаки трофей эмас — у жамоани ҳам, жамиятни ҳам бирлаштиришга уринаётган катта рамз. Фақат рамзни қаерда ва қандай кўрсатиш масаласи ҳамон баҳс туғдиряпти.