Ёрдам йўлда: Доналд Трамп Эрон намойишчиларига мурожаат қилди

АҚШ президенти Доналд Трамп Эрон кўчаларидаги намойишларда қатнашaётган фуқароларни акцияларни давом эттиришга чақирди. У Truth Social саҳифасида эълон қилган баёнотида норозиларни давлат муассасаларини назоратга олишга ундар экан, уларга ёрдам кўрсатилишини ваъда қилди. Бу ҳақда kursiv.uz хабар беради.

Трамп постида “эронлик ватанпарварлар”ни қатъиятли бўлишга, зўравонликда айбдорлар ва “азоб берувчилар”нинг исмларини ёдда сақлашга чақирди ҳамда улар “қиммат баҳо тўлашини” таъкидлади. Шунингдек, у намойишчилар ўлими билан боғлиқ “маъносиз қотилликлар” тўхтамагунча Эрон расмийлари билан барча учрашувларни бекор қилганини билдириб, “ёрдам аллақачон йўлда” эканини ёзди.

Бундан бир кун аввал Эрон ташқи ишлар вазири Аббос Ароқчи мамлакат АҚШнинг исталган қадами, жумладан ҳарбий сценарийга ҳам тайёр эканини маълум қилганди.

Эрон бўйлаб норозилик намойишлари 2025 йил 28 декабр куни Теҳрондаги “Гранд-бозор”да миллий валютанинг қадрсизланиши ва иқтисодий қийинчиликлар фонида бошланган. Орадан кўп ўтмай акциялар бошқа шаҳарларга ҳам тарқалиб, полиция ва “Басиж” отрядлари орасида юзлаб жароҳатланганлар қайд этилгани айтилмоқда.

8 январ куни вазият янада кескинлашиб, намойишчилар автобуслар, тез ёрдам машиналари, уйлар, масжидлар, шифохоналар ҳамда банкларга ўт қўйгани ҳақида хабарлар тарқалди. Ҳукумат бунга жавобан мамлакат бўйлаб интернетга киришни чеклади.