Эрон намойишларида 500 дан ортиқ одам ҳалок бўлди

Reuters хабарига кўра, Эронда нархлар ошиши ортидан бошланган ва икки ҳафтадан бери давом этаётган намойишлар оқибатида камида 490 нафар протестчи ҳамда хавфсизлик кучларининг 48 ходими ҳалок бўлган. Тартибсизликлар пайтида 10,6 мингдан ортиқ киши қўлга олинган. Бу ҳақда kursiv.uz хабар беради.

Теҳрон ҳозирча ҳалок бўлганлар бўйича расмий маълумот эълон қилгани йўқ. АҚШ президенти Доналд Трамп намойишчиларга нисбатан куч ишлатиш давом этса, аралашишга тайёрлигини билдирди.

Манбалар Вашингтон турли сценарийларни кўриб чиқаётганини айтади: киберҳужумлар ва санкцияларни кенгайтиришдан тортиб, аниқ йўналтирилган ҳарбий зарбаларгача. Трамп, шунингдек, Эрон интернетини қайта тиклаш учун Starlink’ни ишга тушириш масаласини Илон Маск билан муҳокама қилаётганини маълум қилди.

Бунга жавобан Эрон парламенти спикери Моҳаммад Боқер Қолибоф эҳтимолий қарши зарба нишонлари сифатида АҚШ базалари, кемалари ва Исроил ҳудудини тилга олди. Эрон расмийлари эса тартибсизликларни авж олдиришда АҚШ ва Исроилни айблаб, аҳолини Ғарбнинг “террорчилик ҳаракатлари”га қарши митингларга чиқишга чақирмоқда.