Loss32 Linux асосида Windowsга ўхшаш тизим бўлади
Интернетда Loss32 деб номланган янги дистрибутив ҳақида хабар тарқалди: лойиҳа Linux ядросини классик Windows руҳидаги иш столи кўриниши билан уйғунлаштирмоқчи. Муаллифлар Windows дастурларини имкони қадар силлиқ ишга туширишни, шу билан бирга Linux учун одатий дастурлар қўллаб-қувватланишини сақлаб қолишни мақсад қилган. Биринчи ишлайдиган прототипни шу ойдаёқ оммага тақдим этиш режалаштирилмоқда. Бу ҳақда playground.ru хабар беради.
Ғоя жиҳатидан Loss32 кўп йиллардан бери чўзилиб келаётган ReactOSга яқин: иккаласи ҳам Microsoft тизимидан таниш тажрибани қайта яратишга уринади. Аммо Loss32 бошқа йўлдан кетмоқда — у Windows NT ядросининг аналогини нолдан ёзишдан воз кечган. Ташаббускорлар айнан шу ёндашув ReactOSни секинлаштиради ва замонавий қурилмалар билан мосликда муаммо туғдиради, деб ҳисоблайди. Шунинг учун Loss32 пойдевор сифатида Debian 13 ва Windows дастурларини ишга тушириш учун Wine қатламига таяниб, асосий урғуни интерфейсга қаратмоқда.
Loss32 архитектурасида Linuxнинг кўплаб стандарт фойдаланувчи макони компонентлари ўрнига Wine ечимлари ва ReactOSдан олинган ишланмалар қўлланади. Иш столи муҳити Win32 иловалари ва кутубхоналарига суянади — explorer.exe ва shell32.dll ҳам шу рўйхатда, композит менежер сифатида эса Mutter ишлатилади. Дизайн эса Microsoft маҳсулотларида 1990-йиллар охиридан 2010-йиллар бошигача оммалашган классик услубда безатилади. Натижада фойдаланувчилар EXE файлларни худди Windowsдагидек осон юклаб, очиши мумкин бўлади.
Лойиҳа муаллифи Win32ни Linux учун барқарор бинар интерфейс сифатида таърифлайди ва кўплаб фойдали дастур ҳамда ўйинлар фақат Windows ижро файллари кўринишида мавжудлигини эслатади. Loss32 Wine'даги ноқулай жиҳатларни юмшатиб, мураккаб созламаларсиз шундай контентни ишга тушириш учун қулай майдон яратишни кўзлайди. Ишқибозлар бу тизим эркин дастурий таъминотни хоҳлайдиган, аммо таниш Windows дастурлари ва классик дизайндан воз кеча олмайдиганлар учун муқобил бўлишига умид қилмоқда.
Муаллифлар кейинроқ Windows XP услубидаги мавзу ҳам қўшишса, мухлислар айтганидек, янада “кайф” бўлиши аниқ.