Lenovo ва Motorola Qira номли янги AI ёрдамчисини тақдим этди
Лас-Вегасдаги CES 2026 кўргазмасида Lenovo ва Motorola Qira деб номланган янги сунъий интеллект платформасини эълон қилди. Компания уни компьютер, планшет ва смартфонларни битта экотизимга боғлайдиган кроссплатформа рақамли ёрдамчи сифатида кўрсатмоқда ва Microsoft ҳамда Google ечимларига рақобатчи бўлишини таъкидламоқда. Бу ҳақда playground.ru хабар беради.
Qira “ambient” форматдаги AI сифатида — яъни алоҳида иловани ишга туширмасдан, операцион тизим ичига чуқур сингдирилган ҳолда ишлайди. У доим фаол режимда экрандаги вазиятни таҳлил қилиб боради: Next Move функцияси фойдаланувчи эҳтиёжини олдиндан сезишга уринади, масалан, овқат суратини кўрса рецепт топишни таклиф қилади. Catch Me Up эса ўтказиб юборилган билдиришномалар ва воқеаларни қисқа жамланма кўринишида тақдим этишга мўлжалланган.
Хавфсизлик масаласида Lenovo гибрид архитектурани танлаб, асосан локал ҳисоблашга урғу берди. Компания вакилларига кўра, Qira маълумотларнинг катта қисмини қурилманинг ўзида қайта ишлаб, фойдаланувчи одатлари бўйича “тирик модел” тузади ва аниқ рухсатсиз шахсий маълумотларни булутга юбормайди. Ёрдамчи e-mail ёзиш, учрашувларни транскрипция қилиш ҳамда уланган гаджетлар ўртасида файлларни бошқариш каби вазифаларни ҳам бажаради.
Шунингдек, Motorola Project Maxwell номли концептуал тақиладиган қурилмани ҳам кўрсатди: камерали ақлли нишон Qira имкониятлари орқали атроф-муҳит билан “мулоқот” қилади. У смартфонсиз туриб овозли буйруқлар билан такси чақириш ёки хабар юбориш каби ишларни бажариши мумкин. Qira 2026 йилнинг биринчи чорагidayоқ Lenovo компьютерларида пайдо бўлиши, Motorola телефонларига интеграция эса кейинроқ амалга ошиши кутилмоқда.