Ўзбекистонда коррупцияни фош қилганларга ҳимоя ордери берилади
Ўзбекистонда коррупцияга қарши кураш тизимида муҳим янгилик жорий этилмоқда. Эндиликда коррупцияга оид жиноятлар ҳақида хабар берган фуқаролар давлат томонидан махсус ҳимоя ордери билан таъминланади. Бу тартиб президент фармонига асосан 2026 йил 1 июлдан кучга киради, дея маълум қилди Адлия вазирлиги.
Янги қарорга мувофиқ, коррупцияни фош этишга ҳисса қўшган шахсларни рағбатлантириш мақсадида “Коррупцияга қарши курашга қўшган ҳиссаси учун” номли махсус кўкрак нишони ҳам таъсис этилмоқда. Бу орқали ҳалоллик ва фаол фуқаролик позицияси қўллаб-қувватланиши кўзда тутилган.
Шунингдек, фармон асосида Рақамли мувофиқликка оид ахборот ва дастурий таъминот мажмуаси синов тартибида ишга туширилади. У коррупцияга қарши кураш кластери иштирокчилари ўртасида тезкор маълумот алмашиш, E-Komplaens модули орқали ички назорат жараёнларини рақамлаштириш ҳамда давлат идораларида қонунбузарликларни олдини олиш бўйича мажбурий кўрсатмалар тизимини жорий этиш имконини беради.
Энг муҳими, коррупция ҳолатлари ҳақида хабар берган шахслар меҳнат қонунчилиги доирасида ҳар қандай таъқиб, босим ёки ноҳақ муносабатлардан ҳимоя қилинади. Бу эса фуқароларни қонунбузарликларга бефарқ бўлмасликка ундайди.
Мутахассислар фикрича, мазкур чора-тадбирлар мамлакатда шаффофликни ошириш, жамиятда адолатли муҳитни мустаҳкамлаш ва коррупцияга қарши кураш самарадорлигини янги босқичга олиб чиқиши кутилмоқда.