Трамп АҚШ Венесуэлани ҳокимият топширилгунга қадар бошқаришини айтди

АҚШ президенти Дональд Трамп Палм-Бичдаги матбуот анжуманида Вашингтон Венесуэлада “хавфсиз, тўғри ва оқилона” ҳокимият алмашинуви таъминлангунча мамлакатни бошқариш ниятида эканини билдирди. Бу ҳақда kursiv.uz хабар беради.

Трампнинг айтишича, АҚШнинг Венесуэладаги амалиёти “Ярим тун болғаси” деб номланган ва “муваффақиятли” якунланган. У Каракасда электр энергияси узилган паллада Мадуро қўлга олинганини даъво қилди.

Оқ уй раҳбари Мадурога нисбатан бир қатор айбловларни ҳам санаб ўтди: у гўёки Cartel de los Soles наркокартелини бошқарган ҳамда АҚШнинг нефть инфратузилмасини ўзлаштирган. Трамп журналистларга бир ҳафта аввал ағдарилган Венесуэла президенти билан гаплашганини, суҳбат чоғида ундан таслим бўлишни талаб қилганини айтди.

Трампнинг таъкидлашича, Венесуэланинг вайрон бўлган нефть тармоғини тиклаш учун АҚШнинг энг йирик нефть компанияларини жалб этиш режалаштирилган. У буни кўп миллиардли сармоялар деб атаб, улар Қўшма Штатларга фойда келтириши кераклигини қайд этди.

Президент Вашингтон бошқа давлатлар “Американи талаши”га йўл қўймаслигини, АҚШнинг Венесуэладаги қолиш муддати эса ҳокимиятни топшириш жараёни қандай кечишига боғлиқ бўлишини билдирди.

Трамп Венесуэла мухолифати етакчиларидан Кристина Мария Мачадо ҳақида ҳам гапириб, аввалроқ АҚШ бостириб киришини қўллаб-қувватлаган бу сиёсатчи “Венесуэлага лидер бўла олмаслиги”ни, унда етакчилик салоҳияти йўқлигини айтди.

Шунингдек, Трамп Кубани “азият чекаётган мамлакат” деб атади ва АҚШ кубаликларга ёрдам беришни хоҳлашини билдирди. Унинг сўзларига кўра, Куба мавзуси келгуси музокараларда асосий йўналишлардан бирига айланиши мумкин.