Туркиялик 55 ёшли аёл Трамп отаси эканини даъво қилиб, уни судга берди
Туркиянинг Анқара шаҳрида истиқомат қилувчи 55 ёшли Нежла Озмен АҚШ Президенти Дональд Трамп унинг биологик отаси эканини даъво қилиб, судга мурожаат қилди. Бу ҳақда турк ОАВлари хабар тарқатди.
Маълумотларга кўра, Озмен 2025 йил 25 сентябрь куни Анқарадаги 27-оилавий судга оталикни аниқлаш бўйича даъво аризаси топширган. Бироқ суд 10 октябрь куни даъвони рад этиб, аризада Трампнинг биологик ота эканини тасдиқловчи етарли ва ишончли далиллар йўқлигини билдирган.
Суд қароридан норози бўлган аёл ишни апелляция тартибида қайта кўриб чиқишни сўраганини, шунингдек АҚШ элчихонаси ва Америкадаги суд идораларига ҳам мурожаат қилганини айтмоқда.
Нежла Озменнинг таъкидлашича, у 1970 йилда туғилган бўлиб, расмий ҳужжатларда Сати ва Дурсун Озменнинг фарзанди сифатида қайд этилган. Унинг айтишича, 2017 йилда онаси асл ҳақиқатни очиқлаб, унинг биологик отаси Дональд Трамп эканини билдирган. Шу сабабли Озмен ДНК экспертизаси ўтказилишини талаб қилмоқда.
Аёл Трамп билан шахсан учрашишни исташини ва ундан фақат оталик масаласига ойдинлик киритишни хоҳлашини таъкидламоқда.