Швейцариядаги чанғи курортида чиққан ёнғин 40 кишининг умрига зомин бўлди
Янги йил кечасида Швейцариянинг Вале кантонидаги Кран-Монтана чанғи курортида жойлашган барлардан бирида портлаш юз бериб, ортидан катта ёнғин келиб чиқди. Маҳаллий ОАВ хабарларига кўра, ҳодиса оқибатида қарийб 40 киши ҳалок бўлган, яна тахминан 100 киши жароҳат олган. Бу ҳақда kursiv.uz хабар беради.
Жароҳатланганларнинг кўпчилигида оғир куйишлар қайд этилган, айримларининг аҳволи оғир. Ҳудуддаги тиббиёт муассасалари имкониятлар чегарасида ишламоқда. Жабрланганларни шифохоналарга етказиш учун санитария вертолётлари жалб этилган, курорт устида эса вақтинча ҳаво қатнови чекланган.
Воқеа юз берган пайтда Le Constellation клубида Янги йил концерти бўлиб ўтаётгани, маскан бир неча юз нафар ташриф буюрувчини қабул қила олиши айтилмоқда. Дастлабки маълумотларга кўра, ёнғин концерт давомида қўлланган пиротехника сабаб келиб чиққан бўлиши мумкин. Ҳуқуқ-тартибот идоралари ҳозирча теракт эҳтимоли кўриб чиқилмаётганини билдирди.
Кран-Монтана Швейцариянинг жануби-ғарбида жойлашган машҳур Алп курорти бўлиб, чанғи трассалари, пиёда сайр йўналишлари ва халқаро спорт мусобақалари билан танилган.