Шавкат Мирзиёев Янги Тошкентдаги университет ва миллий кутубхона қурилиши билан танишди

30 декабр куни Шавкат Мирзиёев Янги Тошкентда барпо этилаётган “Янги Ўзбекистон” университети ҳамда Ўзбекистон Миллий кутубхонаси янги биноси қурилиш жараёнини кўздан кечирди. Бу ҳақда podrobno.uz хабар беради.

Қиймати дастлаб 200 миллион долларга баҳоланган университет мажмуаси 50 гектар ҳудудда жойлашади. Лойиҳа туркиялик мутахассислар билан ҳамкорликда ишлаб чиқилган, қурилиш ишларини O'zg'uv'en компанияси олиб бормоқда.

Мажмуа таркибида 10 минг нафар талаба таҳсил олиши мўлжалланган беш факультет, ректорат, мингдан ортиқ ўринга эга кутубхона, музей, кўргазма зали ва мультимедиа хоналари бўлади. Шунингдек, талабалар ва ўқитувчилар учун минг ўринли спорт иншооти, 2 минг ўринли турар жой бинолари, сузиш ҳавзаси ҳамда овқатланиш шохобчалари қурилиши режалаштирилган.

Янги олий таълим муассасаси 2027 йилдан талаба қабул қилишни бошлаши кутилмоқда.

Бундан ташқари, қарийб 4 гектар майдонда Миллий кутубхонанинг янги биноси ҳам қурилмоқда. Лойиҳада миллий меъморчилик анъаналари замонавий ечимлар билан уйғунлаштирилгани таъкидланди.

Тўрт қаватли иншоотнинг умумий майдони 30 минг квадрат метрдан ортиқ бўлиб, бир вақтнинг ўзида қарийб 1,5 минг китобхонга хизмат кўрсатиш имконини беради. Китоб фондларини сақлаш, ҳисобга олиш, хавфсизлик ва қайта ишлаш учун махсус юқори технологияли хоналар ташкил этилади.

Кутубхона мажмуаси йирик халқаро ва миллий кутубхоналар электрон базаларига онлайн киришни ҳам таъминлайди. Кўришида нуқсони бор фуқаролар учун ўқиш ва тадқиқот олиб боришга мослаштирилган алоҳида муҳит яратилади. Шунингдек, 300 ўринли кафе, галерея, спорт майдончалари ва дам олиш ҳудудлари ҳам барпо этилиши кўзда тутилган.

Аввалроқ Самарқандда 1911 йилда қурилган ва таъмирдан чиқариладиган тарихий бинода жойлашадиган бўлажак Болалар кутубхонаси концепцияси тақдим этилганди. Иншоот Тошкентдаги янгиланган кутубхона тажрибаси асосида, тарихий қиёфа ва давр руҳи сақланган ҳолда реставрация қилиниши режалаштирилган.