АҚШ Давлат департаменти Diversity Visa берилишини вақтинча тўхтатди

АҚШ Давлат департаменти Diversity Visa (DV) доирасида мамлакатга кириш учун рухсат берувчи визаларни вақтинча расмийлаштирмаслигини маълум қилди. Шу билан бирга, аризачилар ҳужжат топширишда давом этиши, суҳбатлардан ўтиши ва янги интервью саналари белгиланиши сақланиб қолади. Бу ҳақда kursiv.uz хабар беради.

Идора хабарига кўра, аввалдан тайинланган суҳбатлар режа бўйича белгиланган муддатларда ўтказилади. Бироқ ҳозирча интервьюдан муваффақиятли ўтганларга ҳам АҚШга кириш визалари берилмайди. Давлат департаменти аризачиларни дастур бўйича кейинги қарорлар ҳақида хабардор қилиб боришини билдирган.

Эслатиб ўтамиз, декабрь ўрталаридан АҚШ ички хавфсизлик вазири Кристи Ноем Green Card лотереяси ғолиблари учун мўлжалланган DV-1 дастурини тўхтатиш нияти борлигини айтганди. Ушбу йўналиш орқали ҳар йили АҚШга қарийб 50 минг киши келиб яшаш имконига эга бўлар эди.

Ноемнинг изоҳича, икки талабанинг ўлдирилишида гумон қилинаётган Браун университети билан боғлиқ португалиялик Клаудио Мануэле Невеше Валенте саккиз йил аввал айнан шу виза орқали АҚШга кирган. Ҳалок бўлганлар орасида Ўзбекистонлик фуқаро ҳам бўлгани қайд этилган.

CBS, шунингдек, АҚШ президенти Дональд Трамп визалар лотереясини анчадан бери танқид қилиб келишини, уни мамлакат хавфсизлигига таҳдид сифатида баҳолашини эслатди. Дастур тарафдорлари эса DV иқтисодиётга ижобий таъсир кўрсатиши ва АҚШ имиджини яхшилашини таъкидлашмоқда.