Ўзбекистон жийда экспортни бир йилда қарийб 69 фоизга оширди
Ўзбекистон 2025 йилнинг 11 ойи якунида 5,4 минг тонна жийда экспорт қилди. Миллий статистика қўмитаси маълумотларига кўра, бу кўрсаткич ўтган йилнинг шу даврига нисбатан 68,8 фоизга кўп. Бу ҳақда kursiv.uz хабар беради.
Экспортдан тушган тушум 9,1 млн долларни ташкил этди. Жийданинг энг йирик харидори Туркия бўлиб, бу мамлакатга 2,1 минг тонна маҳсулот етказиб берилган. Хитой 957 тонна, Қозоғистон эса 852 тонна жийда импорт қилган.
Ўзбекистон жийдасини кўп харид қилаётган давлатлар бешлигидан Россия (508 тонна) ва Озарбайжон (396 тонна) ҳам ўрин олди.
Жийда — лох дарахтида (кўпроқ кумуш ёки шарқий лох) ўсадиган, ширинимсиқ ва бироз тахир таъмли мева. У Марказий Осиёда, жумладан Ўзбекистонда кенг тарқалган бўлиб, кўпинча қуритилган ҳолатда истеъмол қилинади, ширинликларга қўшилади ҳамда халқ табобатида қўлланади.