Россия газ экспортини Марказий Осиёга кескин оширди
2025 йилнинг январ–ноябр ойлари якунларига кўра, Россиядан Марказий Осиё давлатлари ҳамда Афғонистонга суюлтирилган углеводород гази — пропан ва бутан етказиб бериш ҳажми кескин суръатларда ошди. Экспорт қарийб икки баробарга кўпайиб, 1 миллион тоннадан ошиб кетди. Бу ҳақда Reuters манбаларга таяниб хабар берди.
Агентлик маълумотларига кўра, Брюссель томонидан СУГга нисбатан санкциялар жорий этилганидан сўнг, Москва аввал Европа бозорига мўлжалланган ҳажмларни янги йўналишлар — асосан Марказий Осиё ва қўшни минтақаларга қайта тақсимлаган. Ушбу ёқилғи кўпинча иситиш мақсадларида, шунингдек, нефть-кимё саноатида фаол қўлланилади.
Натижада Афғонистон ва минтақанинг бошқа давлатларига жўнатилган газ ҳажми Россиянинг умумий СУГ экспортида 36 фоизни ташкил этди. Солиштириш учун, ўтган йили бу кўрсаткич атиги 19 фоиз даражасида бўлган.
Энг йирик харидор сифатида Афғонистон етакчиликни сақлаб қолмоқда. Россиядан импорт ҳажмининг ошиши Эрон экспорти қисқарган бир пайтга тўғри келди. Маълумки, Эрон Америка Қўшма Штатлари санкциялари таъсирида қолмоқда ва бу унинг минтақавий бозордаги имкониятларини чеклаган.
Қайд этилишича, Афғонистон жорий йил декабр ойи бошига қадар хориждан нефть ва нефть маҳсулотларини 1,8 миллиард долларга, табиий газни эса 1,4 миллиард долларга импорт қилган. Бу кўрсаткичлар мамлакат учун Россия билан энергетика соҳасидаги ҳамкорлик қанчалик муҳим эканини яна бир бор кўрсатиб турибди.