Маст ҳолда ўзганинг Gentra'сини олиб қочган шахс "авария"га учради
Тошкент шаҳар ИИББ ахборотига кўра, транспорт воситасини олиб қочган шахс қўлга олинди. Бу ҳақда upl.uz хабар беради.
Олмазор тумани Қорақамиш 2/4 даҳасида яшовчи фуқаро 102 рақами орқали мурожаат қилиб, Gentra автомобилининг сигнализацияси ишга тушганини айтди. У деразадан қараганда номаълум киши машинага ўтириб, соат 23:40 да (Тошкент вақти билан) воқеа жойидан кетиб қолган.
Тезкор қидирув тадбирлари натижасида олиб қочилган Gentra йўл-транспорт ҳодисасидан сўнг шикастланган ҳолатда топилди. Ҳайдовчи Spark билан тўқнашиб, ҳодиса жойидан қочиб кетгани маълум бўлди. Орадан кўп ўтмай у Шайхонтоҳур туманидаги уйлардан бирида аниқланиб, ушланган.
Суриштирувда гумонланувчи жиноят вақтида спиртли ичимлик таъсирида бўлгани, “сайр қилиб келиш” ниятида яқин атрофдаги автомобилнинг орқа эшиги ойнасини синдириб, калит ёқиш тизимида қолиб кетгани учун машинани ҳайдаб кетгани қайд этилди. Маълумотларга кўра, у икки ой аввал пойтахтга иш излаб келган ва хусусий уйда брусчатка ётқизиш билан шуғулланган.
Ҳолат юзасидан Жиноят кодексининг “Транспорт воситасини олиб қочиш” моддаси билан жиноят иши қўзғатилди. Ушбу модда бўйича энг кам жазо 5 йилдан 10 йилгача озодликдан маҳрум этишни ташкил қилиши мумкин.