Миржалол Қосимов тан олди: “Бу ўйинга фақат икки баҳо қўяман!”

Суперлиганинг 12-туридан ўрин олган ОКМК – "Шўртан" учрашувидан сўнг жамоа бош мураббийи Миржалол Қосимов ўйин бўйича шахсий фикрларини билдириб ўтди. Унинг айтишича, бугунги кунда натижага етишиш учун ҳар бир беллашувга жиддий ёндашиш талаб этилади ва футболни ҳеч қачон алдаб бўлмайди.

"Бугунги ўйинга катта икки қўяман. Футболни алдашнинг иложи йўқ. Турнир жадвалидаги ўрнингдан қатъи назар, ҳар бир ўйинга юқори даражадаги тайёргарлик билан чиқиш зарур. Илгариги бир нечта учрашувларда тўлиқ тайёргарликсиз майдонга чиқиб, барибир ғалаба қозонгандик. Аммо бу сафар барчаси бошқача бўлди. 1-дақиқаданоқ кураш бошланиши керак эди", – деди Қосимов.

Мураббийга кўра, жамоанинг ҳаракатларига ФИФА кунларидаги танаффус салбий таъсир кўрсатган. "Ёшларимиз Францияда бўлишди, Тўхтахўжаев терма жамоага жалб қилинди – бундай омиллар жамоа уйғунлигига таъсир кўрсатмай қолмайди", дея таъкидлади мутахассис.

У иккинчи бўлимда жамоа бир қатор имкониятлар яратганини, аммо улардан унумли фойдаланишда муаммолар кузатилганини тан олди. Ҳар ҳолда, Қосимов миллий терма жамоа ва Ўзбекистон футбол федерациясини тарихий ютуқ билан табриклашни унутмади.

"Миллий терма жамоамизни, ЎФА раҳбариятини чин дилдан табриклайман. Бу натижа нафақат тарихий, балки бутун халқимиз учун ифтихорли воқеа бўлди. Олдиндаги ўйинларда ҳам омад ҳамроҳ бўлишини тилаб қоламан", – деди у.

Миржалол Қосимовнинг бу сўзлари жамоанинг ички муҳитида ҳам жиддий таҳлил ва хулосалар кутилаётганидан далолат беради. Навбатдаги ўйинларда ОКМК қандай ўзгаришлар билан майдонга тушиши барча футбол ишқибозларини қизиқтирмоқда.