Афинада ёшлар поезд ҳалокати муносабати билан норозилик намойишлари уюштирди

Греция ёшлари чоршанба куни кечки пайт Афина ва Салоники шаҳарларида йўловчи поездининг Лариса шаҳри яқинида ҳалокатга учраши муносабати билан норозилик намойишлари ўтказди. Поездлар тўқнашуви натижасида камида 47 киши ҳалок бўлди, ўнлаб одамлар жароҳат олди. Бу ҳақда Skai телеканали маълум қилди.

Афинада ёшлар дастлаб Грециядаги барча йўловчи ва юк ташишларни амалга оширадиган Италиянинг Hellenic Train темирйўл компанияси идораси олдида тўпланишди. Ушбу компаниянинг йўловчи поезди 1 март куни, ҳали расман аниқланмаган шароитларда, Лариса шаҳри яқинида юк поезди билан тўқнашган. Турли ёшлар ташкилотлари гуруҳлари компания офиси олдида шам ёқиб, қора байроқ кўтарган ҳолда митинг ўтказдилар. Бироқ, полиция кўздан ёш оқизувчи газ ишлатиб, уларни офисга киришига қаршилик қилди.

Натижада, тартибсизликлар марказий Синтагма (Конституция) майдонига туташ кўчаларга кўчди. Йўлда намойишчилар ахлат қутиларига ўт қўйишган. Полиция яна намойишчиларни кўздан ёш оқизувчи газ ёрдамида тарқатишга ҳаракат қилди. “Эфимерида тон синдактон» газетасининг ёзишича, Греция парламенти деворлари ёнидаги Синтагма майдонидаги акцияда 2,5 мингга яқин киши иштирок этган.

Салоникида ёшлар норозилик намойиши ўтказди. 2000 га яқин иштирокчилар шаҳар маркази бўйлаб юришди, шунингдек, Салоники янги вокзалига ташриф буюришди ва у ерда темирйўл ҳалокати қурбонлари хотирасига гул қўйишди.