Ўзбекистон қонун устуворлиги бўйича АҚШ адлия идоралари тажрибасини ўрганади — Бизга қўшилинг: ???? https://t.me/joinchat/AAAAADwt0NGCRoONT4f1_Q
Фото: «Дунё» ахборот агентлиги Республика Олий суди, Адлия вазирлиги, Тошкент шаҳар маъмурий суди ходимларидан иборат Ўзбекистон делегацияси қонун устуворлигини таъминлаш соҳасида тажриба алмашиш ва бу борадаги АҚШ адлия идоралари ишларини ўрганиш мақсадида Теннесси штатига ташриф буюрди, деб хабар бермоқда «Дунё» ахборот агентлиги. Қайд этилишича, мамлакат делегациясининг ушбу ташрифи Конгресс кутубхонаси қошидаги парламент дипломатиясини ривожлантиришга ихтисослашган «Очиқ дунё» етакчилик маркази билан ҳамкорликда ташкил этилган. Маълумот учун, 1999 йилда АҚШ Конгресси томонидан ташкил этилган «Очиқ дунё» дастури халқ дипломатиясини ривожлантириш, ўзаро англашув ва ҳамкорликни мустаҳкамлаш, ҳар икки томон учун энг муҳим масалалар бўйича ғоялар, касбий ўсишни таъминлаш, бизнес ва шахсий алоқаларни ривожлантириш бўйича тажриба алмашиш мақсадида АҚШ ҳамкорлари учун қисқа муддатли профессионал сафарларни ташкил этади. «Очиқ дунё» маркази мустақил Васийлик кенгаши томонидан бошқарилади ва йил давомида кенгайтирилган алмашув дастурини бошқаради. Марказ АҚШ Конгресси кутубхонасининг бўлими ҳисобланади. 2022 йил бошидан буён Марказ Ўзбекистон вакиллари учун АҚШга учта танишув сафарини ташкил қилган. Ўзбекистон адлия идоралари вакиллари АҚШ Давлат департаменти, Америка судлари маъмурий бошқармаси, Теннесси прокуратураси ва суд хизматлари вакиллари, Кентукки судьялари, шунингдек, АҚШ адлия ва суд тизими соҳасидаги эксперт ва профессорлар билан учрашган. Бундан ташқари, Кентукки штатида бўлган Ўзбекистон делегацияси жиноят ишлари бўйича судья Скотт Грин, бош судьялар Чак Черни ва Патриция Лонг, шаҳар жамоатчи ҳуқуқшунослари Дэвид Элдриж ва Роб Курс ҳамда маҳаллий прокуратура вакиллари билан мулоқотлар ўтказган. Кентукки штатида суд-ҳуқуқ тизимини такомиллаштириш, суд ҳокимиятининг роли ва нуфузини мустаҳкамлаш, судларнинг мустақиллигини таъминлаш ва судьяларни тайёрлаш мавзусида Теннесси университети юридик коллежи экспертлари ва профессор-ўқитувчилари билан конструктив суҳбат ташкил этилган. Ушбу тадбирлар доирасида Америка томонига Ўзбекистон тараққиётидаги асосий ютуқлар, суд-ҳуқуқ тизимини ва адлия органлари фаолиятини ҳар томонлама такомиллаштириш, жумладан, жиноят-процессуал қонунчилигини либераллаштириш бўйича кўрилаётган чора-тадбирлар ҳақида батафсил маълумот берилган. Соҳани ислоҳ қилиш, ҳуқуқ-тартиботни таъминлаш Ўзбекистон тараққиёт стратегиясининг устувор йўналишларидан бири экани алоҳида таъкидланган.