АҚШ Қирғизистонда конституциявий тузум учун таҳдид пайдо бўлганидан ташвишда

АҚШнинг Бишкекдаги элчихонаси 13 октябрь куни Қирғизистондаги вазият ҳақида баёнот тарқатди. Унда Қўшма Штатлар республикадаги тинч ва демократик ўтиш даврини дастаклаши айтилган. Айни пайтда АҚШ Қирғизистон конституциявий тузумига таҳдидлар пайдо бўлганидан хавотир билдирган.

“Маълумки, демократик тараққиёт йўлидаги ғовлардан бири уюшган жиноий гуруҳларнинг сиёсат ва сайловларга таъсир ўтказишга уриниши бўлиб ҳисобланади. 4 октябрь куни сайлов чоғида овозларни сотиб олиш, “Ала-Тоо” майдонида одамларни қўрқитиш ва у ердаги зўравонлик ҳамда 10 октябрь куни парламент мажлисидаги ҳуқуқбузарликлар ана шундан далолат беради”, дейилган элчихона баёнотида.

АҚШ “Қирғизистон сиёсий ҳаётининг конституциявий тартибга қайтиши бўйича президент Сўўрўнбай Жээнбеков, сиёсий лидерлар, фуқаролик жамияти ва ҳуқуқшунос олимларнинг саъй-ҳаракатлари”ни дастаклашини маълум қилган.

“Фуқаролар ва уларнинг лидерлари уюшган жиноятчилик ва коррупциянинг сиёсатга таъсир кўрсатишига қарши курашни давом эттиришлари зарур. Бунда якуний мақсад Қирғизистон конституциясига риоя қилиш ва қонун устуворлиги бўлиши лозим”, дейилган баёнотда.

Қирғизистонда 4 октябрь куни бўлиб ўтган парламент сайловидан кейин сиёсий бўҳрон вужудга келган. Сайлов натижаларини бекор қилиш талаби билан бошланган норозилик акциялари тартибсизликларга айланиб кетган.

6 октябрга ўтар кечаси намойишчилар президент аппарати ва парламент фаолият юритадиган “Оқ уй”ни эгаллаб олишган. Мамлакатда турли сиёсий кучлар ўртасида ҳокимият учун кураш бошланиб кетган.

10 октябрь куни парламент депутатларининг бир қисми “Ала-Арча” давлат қароргоҳида навбатдан ташқари мажлисга йиғилиб, у ерда Садир Жапаров бошчилигидаги ҳукумат таркибини маъқуллаган. Бироқ президент Сўўрўнбай Жээнбеков ҳукумат дастурини тасдиқлаш, ҳукумат тузилиши ва таркибини белгилашга оид қарорни парламентга қайтарган. Унинг фикрича, 10 октябрь куни бўлиб ўтган парламент мажлисида кворум бўлмаган.