Қозоғистоннинг уч вилоятида коронавирус туфайли карантин чоралари кучайтирилди
Қозоғистоннинг Шимолий Қозоғистон, Манғистау ва Атирау вилоятларида COVID-19 важидан қатъий карантин чоралари киритилди. Манғистау ва Атирау карантин чоралари 13 октябрдан кучайтирилган. Мулозимлар бунга хасталик юқтириб олганлар сони кескин ошиб кетганини сабаб ўлароқ кўрсатмоқдалар.
Эндиликда бу вилоятларда спорт объектлари ишламайди, озиқ-овқат дўконлари ва бозорлар иш тартиби қисқартирилади. Шимолий Қозоғистон вилоятида блокпостлар ўрнатилган. Маҳаллий расмийлар буларнинг ҳали энг кескин чоралар эмаслигини ва қатъий карантин режими камида икки ҳафта давом этишини айтмоқдалар.
Бошқа минтақаларда ҳозирча чеклов чоралари билан кифояланмоқдалар, айни пайтда у ерларда ҳам жамоат жойларида ниқоб тақиб юриш мажбурийлигича қолмоқда. Кўнгилочар объектларнинг кўпи ҳали ҳам ёпиқлигича қолмоқда.
Олмаота шаҳри мэри Бахитжан Сағинтаевга кўра, жанубий пойтахтда хасталар сони ошган, бироқ вазият ҳозирча барқарор ва карантин чораларини кучайтиришга ҳожат йўқ. Давлат телеканалига берган интервьюсида у Олмаотада карантин чоралари бир кеча-кундузда касаллик юқтириб олганлар сони 250 нафардан ошганидагина кучайтирилишини билдирган.
Олмаоталикларнинг ўзлари эса чеклов ва тақиқлардан чарчаганларини эътироф этишмоқда ҳамда баҳорда бўлгани каби шаҳарни бутунлай ёпишга ҳожат қолмаслигига умид қилишяпти. Лекин айримлар янгитдан карантин чоралари кучайтирилишига ҳам рози.
Қозоғистонда бугунги кунда коронавирусга чалинганлар сони 108 минг 901 нафарга етган. Расмий маълумотларга кўра, мамлакатда коронавирус юқиши ортидан 1771 киши қурбон бўлган.