Путинни ҳақоратлаган грузиялик журналистни ким ўлдирмоқчи бўлди? — Бизга қўшилинг: ???? https://t.me/joinchat/AAAAADwt0NGCRoONT4f1_Q
Грузия давлат хавфсизлик хизмати Тбилисида россиялик фуқаро ҳибсга олинганини маълум қилди. У Грузиянинг “Мтавари архи” телеканали журналисти Георгий Габунияни ўлдирмоқчи бўлгани айтилмоқда. Хавфсизлик хизмати гумонланувчининг тўлиқ исмини ошкор этмади, бироқ телеканал директори Ника Гварамия бу ингушетиялик Васамбек Боков эканини маълум қилди. Боков сохта ҳужжатларни сотиб олиш, сақлаш ва ишлатишда айбланмоқда. Гварамиянинг иддаосига кўра, журналистни ўлдиришга Чеченистон раҳбари Рамзан Қодиров буйруқ берган бўлиши мумкин. “У Габунияни жазолашини айтган эди”, – деди телеканал директори. Шунингдек, у Боковнинг суиқасдга тайёрланаётгани ҳақида Грузия махсус хизмати ходимларига украиналик ҳамкасблари хабар берганини ҳам айтди. Георгий Габуния 2019 йилнинг 7 июлидаги телеэфирда Россия президенти Владимир Путинни қаттиқ ҳақорат қилган, уни “Вовочка” ва “сассиқ босқинчи” деб атаган эди. Бундан ташқари, у “Россия президенти ўз қуллари билан” Грузияни тарк этиши кераклигини таъкидлаган. Журналистнинг сўзларини Грузия раҳбарлари қоралаб чиққан.