Булоқбошида яширинча никоҳ ўқиган ота уч суткага қамалди
Андижон вилоятининг Булоқбоши туманида отга ўғлига яширинча никоҳ ўқигани учун Маъмурий суд тҳукми билан уч суткага қамалди. Бу ҳақда 10 июнда “Дарё” нашри хабар берди.
Хабарда айтилишича, ўғил биринчи хотини билан қонуний никоҳни бекор қилмай туриб, бошқа аёлга шаърий никоҳ ўқитиб уйланиб олган. Биринчи хотин бу ҳақда Булоқбоши туман ИИБга шикоят қилган.
“Ички ишлар ходимлари томонидан олиб борилган ўрганишлар натижасида Аббос Солиев 2020 йилнинг 3 май куни диний идоранинг махсус рухсатномасисиз Сайёра Фарҳодованинг яшаш хонадонида ўғли Аҳрор Солиев ва унга шаръий никоҳ ўқиб, диний маросимлар ўтказиш қоидаларини бузганлиги аниқланган”, дейилади хабарда.
Маълум бўлишича, биринчи хотин 2016 йилда аразлаб уйига кетиб қолган ва ўшандан бери эри билан яшамаган.
Судда ота ўғлига никоҳ ўқитиш учун бир нечта домлага мурожаат қилганини, лекин улар никоҳ ўқишга кўнмаганини, шундан сўнг ўзи никоҳ ўқишга мажбур бўлганини айтган.
Жорий йилнинг 20 март куни Андижон вилоят, Асака туман маъмурий суди томонидан Ўзбекистон инсон ҳуқуқлари "Эзгулик" жамияти Андижон вилоят бўлими раиси Мусажон Бобожонов ҳам қўшнисига никоҳ ўқиганликда айбланиб, 15 суткага озодликдан маҳрум қилинганди.
2019 йилнинг сентябрида Фарғона вилоятининг Қўштепа туманида ўғлига никоҳ ўқиган ота суд ҳукми билан етти кунга қамалганди.