Рамзан Қодиров дам олиш кунлари кўчада юрганлар ишдан бўшатилишини маълум қилди
Фото: vesti95.ru Чеченистон 18—19 апрель, дам олиш кунлари, учун қатъий карантин эълон қилди. Шу куни фақат тиббиёт ходимлари, ЙПХ, коммунал хизмат ва фавқулодда вазиятлар хизмати ходимлари ва махсус рухсатномага эга бўлган шахсларгина ҳаракатланиши мумкин. Бу ҳақда республика раҳбари Рамзан Қодиров коронавирусга қарши кураш бўйича тезкор штаб йиғилишида маълум қилган. «Шанба ва якшанба кунлари тиббиёт ходимлари, ЙПХ, фавқулодда вазиятлар ва коммунал хизмат ходимлари ва оператив штат томонидан берилган махсус рухсатномага эга шахслардан ташқари бошқаларни кўчага чиқмасликка чақираман. Қолган барча шахслар, шу жумладан, вазирлик ва идора ходимлари шу икки кун давомида уйда ўтиришлари лозим. Агар юқорида номи санаб ўтилмаган давлат хизматчиларининг кўчада юргани аниқланса, улар дарҳол ишдан бўшатилади», — деган Рамзан Қодиров. Аввалроқ Чеченистон раҳбари «ўзини яккалаш» тартибини бузган фуқаролар учун янги жазо чорасини ўйлаб топганди. У карантинга риоя қилмаганларни қишлоқ хўжалиги ишларига жалб қилишни таклиф этган. «Уйида тинчгина ўтира олмай кўчага чиқдими? Демак, ҳар куни далада ишлаб элга фойда келтиради. Биз унга (қоидабузарга) иш топиб берамиз. Ер чопади, экин экади ва уни парваришлайди», — деганди Қодиров. Коронавирус эпидемиясига қарши кураш доирасида Чеченистон 5 апрель куни ўз чегараларини ёпганди. Чекловлар ишлаб чиқариш транспорти ва тиббиёт буюмларини ташишга тааллуқли эмас. Бундан ташқари, республикада тунда кўчага чиқиш тақиқланган. Қодировнинг айтишича бу ҳали «коммендатлик соати» эмас, балки «ҳаракатни-тўхтатиш» чораси. Март ойида Рамзан Қодиров одамларни коронавирусдан қўрқмасликка ва саримсоқ ейишга чақирганди.