“Prezidentni ko‘ramiz deb borcak, begona uyga bir necha soatga qamab qo‘yishdi”
Bo‘ka, Piskent, Parkent, Ohangaron, Bekobod, Quyichirchiq, Oqqo‘rg‘on va Chinoz tumanlarida sanoat rivoji pastligicha qolmoqda. Quyichirchiq, Bekobod, Ohangaron, Piskent va Bo‘ka tumanlarida aholi jon boshiga xizmat ko‘rsatish hajmi respublika bo‘yicha o‘rtacha ko‘rsatkichdan 2−3 barobar kam.
Bu haqda Prezident Mirziyoev 3 iyun kuni Nurafshon shahrida Toshkent viloyat faollari, hokimlar va sektorlar rahbarlari, respublika idoralari mutasaddilari ishtirokida o‘tkazilgan yig‘ilishda aytgani to‘g‘risida davlat rahbari rasmiy sayti xabar qildi.
1 iyun kuni prezident Mirziyoev Toshkent viloyatiga amaliy safar bilan borgan edi. Shu kuni prezident Angren shahrida bo‘ldi.
Viloyatning Bo‘ka tumanidan Ozodlikka kelgan xat muallifining yozishicha, davlat rahbarinining shu tumanga ham kelishi kutilgan.
Xatda prezidentni kutib olishga qanday tayyorgarlik ko‘rilgani hamda uning xavfsizligi qanday ta’minlangani tasvirlangan:
Toshkent viloyati Bo‘ka tumanidan yozmoqdaman. Tumanimizga “prezident Shavkat Miromonovich tashrif buyuradi” deya olamjahon ishlar qilindi. Bo‘ston mahallasi city’ga aylanar ekan. Bo‘stonda park va to‘qimachilik korxonasi ochilish marosimi bo‘ladi, prezidentni ko‘ramiz, deb borsak, hammayoqni Milliy gvardiya yigitlari bosib ketibdi.
Bekoboddan ikki avtobus erkaklarni olib kelishibdi, ular prezident kelishiga bog‘ va yo‘lakni yog‘ tushsa yalagudek qilib tozaladi. Ayollar ham har besh daqiqada o‘rindiqlarni artish bilan ovora. Qishloq bolalari bayramda “Bahor” lageriga bormay shu yerga kelgan ekan, bayram kechga deb hammani quvib chiqarishdi.
Yoshlar ittifoqi rahbari Qahramon Quronboev bir deputat bilan kelgandi. Shu orada xalq orasidan bir keksa onaxon chiqib “arzim bor” deb qoldi. Ratsiya ko‘targan ikki ayol haligi onaxonni avrab “Damas”ga o‘tirg‘izib, olib ketishdi.
Biz ham prezident bilan uchrashamiz deb borgandik. Ammo bir xonadonda dam olib keyinroq chiqamiz desak, har bir darvoza tagida uyulib turgan Milliy gvardiya yigitlari uydan chiqarishmadi. Begona uyda 10 ta ayol 3 soat qamalib o‘tirdik. Axiyri o‘tirgandan foyda yo‘q deb uch kishi xonadon egasining molxonasidan ko‘chaga oshib tushib, amallab uyga yetib oldik. Bizdan boshqa ayollarni soat 17:30 da chiqarishibdi.
Prezident kiradigan va kirmaydigan ko‘chalardagi farqni ko‘rib achinib ketdik. Laganbardorlik, ko‘zbo‘yamachilikning nima keragi bor?! Butun O‘zbekistonni aldashmoqda bular...”
Ozodlikka Bo‘kadan 3 iyun kuni kelgan bu xat muallifi o‘z maktubiga tuman markazining "Prezident kiradigan va kirmaydigan ko‘chalardagi farqni" ko‘rsatish uchun quyidagi bir necha suratni ham ilova qildi.
Eslatma: OzodMaktub rukni ostida chop etiladigan fikrlar muallifning shaxsiy qarashlari ifodasidir. Ozodlik bu mulohazalar uchun mas’ul emas.