Bekobodda emlash hamshirasi paxtaga chiqarilgani ortidan 7 nafar bola noto‘g‘ri emlandi
7 noyabr kuni Ozodlikka bog‘langan bekobodlik ota-onalar¸ 3 yoshdan 6 yoshgacha bo‘lgan 7 nafar bolaga kalendarga muvofiq gepatit "A" o‘rniga¸ gepatit "B"ga qarshi katta dozada emlash qilgan tibbiyot xodimlari jazolashni va o‘z farzandlarining mustaqil tibbiy tekshiruvdan o‘tkazishni talab qilishdi.
Ayni shu talab bilan 7 noyabr kuni O‘zbekiston Bosh prokuraturasiga kelgan bekobodlik ota-onalarga ko‘ra¸ bu voqea 25-26-27 oktabr kunlari Bekobod shahridagi Metallurg shifoxonasiga qarashli bolalar poliklinikasida sodir bo‘lgan.
Poliklikaning emlash kabineti hamshirasi Saodat Qobulova paxtaga jo‘natilib¸ uning o‘rnida ishlash buyurilgan Metallurgiya kombinati hamshiralari¸ gepatit "B"ga qarshi oldin emlangan 7 nafar bolaga yana ayni vaksinani katta dozada bergan.
Ozodlik gaplashgan hamshiraga ko‘ra¸ kasalxona rahbariyati bu xatolikdan xabar topgach¸ ota-onalarni ogohlantirish o‘rniga¸ voqeani bekitishga uringan.
Ota-onalar emlashdan beri burun qonashi¸ isitma¸ lanjlik va ishtahasizlikdan aziyat chekayotgan bolalarning uzoq muddatli salomatligi tahdid ostida ekanidan cho‘chimoqda.
Xatolik – hamshiralar paxtaga jo‘natilgani oqibatida ro‘y bergan
Metallurg shifoxonasiga qarashli bolalar poliklinikasi emlash xonasiga mas’ul bo‘lgan hamshira Saodat Qobulova¸ 25 oktabr kuni uch kunga Bekobod tumanidagi Mallavoy fermer xo‘jaligi hududida paxta terishga yuborilgan.
Hamshiraning Ozodlikka aytishicha¸ bu buyruq 24 oktabr tungi soat 11 dan keyin berilgan va bosh hamshira o‘zini paxtaga chiqmaslik oqibatlaridan ogohlantirgan.
25 oktabr tonggi soat 6:30 da paxtaga jo‘nash uchun aytilgan joyga borgan Qobulova o‘rniga¸ Metallurgiya kombinatida ishlovchi ikkita hamshira qo‘yilgan.
Bolalarni emlash tajribasiga ega bo‘lmagan bu ikki hamshira 25-27 oktabr kunlari gepatit Aga qarshi emlashga chaqirtirilgan 7 nafar bolani gepatit "B"ga qarshi kattalar dozasida emlagan¸ ammo bolalar emlash daftariga bu vaksina gepatit "A" deb yozib qo‘ygan.
Bu xatolik¸ emlash hamshirasi Saodat Qobulova paxtadan ishga qaytib¸ sovutgichdagi vaksinalar hisobini qilgan paytda yuzaga chiqqan.
- Odatda oyning 25 kuni SESga qancha vaksina qilingani haqida hisob beraman. Lekin o‘tgan oy paxtada bo‘lganim uchun¸ 29 oktabr kuni hisob berish uchun xolodilnikni tekshirsam¸ gepatit "B" ga qarshi yetti dona vaksina yetishmayapti. Surishtirsam¸ men yo‘g‘imda ishlash buyurilgan hamshiralar "A" o‘rniga "B" qilgan. Ularni chaqirtirib¸ darrov xatolik haqida tushuntirish yozdirib oldim. Bo‘lmasa¸ buning mas’uliyati menga tushardi¸ - deydi Qobulova Ozodlik bilan suhbatda.
Hamshiraga ko‘ra¸ shundan so‘ng voqeadan xabar topgan shifoxona bosh vrachi va poliklinika boshlig‘i xatolikni bekitish uchun emlash daftarini qaytadan soxtalashtirib yozib chiqish va bu haqda ota-onalarga hech nima demaslikni buyurgan.
Qobulovaning aytishicha¸ u bunga ko‘nmagan va emlash daftari¸ xatoga yo‘l qo‘ygan hamshiralar yozib bergan tushuntirish xatini olib Bekobod prokuraturasiga murojaat qilgan.
Prokuratura idorasidan chiqqan Qobulova, o‘zining aytishicha¸ noto‘g‘ri emlangan bolalardan xabar olish va ota-onalarni ogohlantirish uchun ularning uyiga borgan.
Vahima
Noto‘g‘ri emlanganlardan biri Bekobod shahar 12-mikrorayon 48-uy 27-xonadonda yashovchi Guloyim Rahimovaning 6 yashar nevarasi Shohruh Abdusamatovdir.
Rahimovaning Ozodlikka aytishicha¸ Shohruhni bog‘chaga qo‘yish uchun gepatit "B"ga qarshi emlash olishi talab qilingani ortidan¸ uni 25 oktabr kuni onasi poliklinikaga olib borib¸ 150 ming so‘m to‘lab¸ emlatgan.
- O‘sha kuniyoq bolaning mazasi qochib¸ isitmasi ko‘tarilib¸ zardob qayt qila boshladi. Qizim¸ emlashdan keyin shunaqa bo‘larkan¸ dedi. Biz meditsinadan ko‘p ham xabari yo‘q odamlarmiz. Boshqa uyga ko‘chayotganimiz uchun¸ bolani yotqizib qo‘ysak¸ soatlab ko‘zini ochmadi¸ovqat yemay qo‘ydi¸ faqat suv so‘radi. Detskiy vrachga olib borsak¸ tomog‘i og‘rigan deb¸ analgin-dimedrol berdi. Vaksina xayolimizgayam kelmapti¸ - deydi Guloyim Rahimova.
3 noyabr kuni uyiga emlash hamshirasi Saodat Qobulova kelib¸ Shohruhning ahvolini surishtirgan va bosiqlik bilan ularga bolaning xatolik oqibatida katta dozadagi boshqa vaksina bilan emlanganini tushuntirgan.
- Juda qo‘rqib qoldik¸ bittayu bitta o‘g‘il nevaram. 5 noyabr¸ dushanba kuni Toshkentga borib¸ Minzdravdagi Dilorom Tursunova degan ayolga shikoyat qildik¸ to‘liq tekshirib¸ bolalarimizni davolatib bering¸ deb. Mutaxassis yuborib¸ masalani o‘rganamiz¸ dedi. Ertasiga Bekoboddagi medsanchastda uchrashuv bo‘ldi. Toshkentdan kelganlar ham qatnashdi. Hamshiralar oldiniga tondi¸ keyin tan olib¸ kechirim so‘radi¸ ishdan ketishga tayyorman¸ dedi. Bolalarni bir oydan keyin qon olib¸ tekshiramiz deyishdi. Men xato ishni qilib¸ bolalarning sog‘lig‘ini emas¸ balki o‘z shkurasini o‘ylab¸ uni bekitishga uringanlarga ishonmayman¸ deydi Guloyim Rahimova.
Bu uchrashuv va unda aytilganlardan qanoatlanmagan 7 bolaning ota-onasi¸ voqeani ob’ektiv o‘rganib¸ aybdorlarni jazolash va bolalari salomatligi uchun mas’uliyatni tibbiyot xodimlari zimmasiga yuklash talabi bilan 7 noyabr kuni Bosh prokuraturaga arzga kelgan.
7 noyabr kuni mahalliy vaqt bilan kechki soatlarda Ozodlik qayta bog‘langan ota-onalar vakillariga ko‘ra¸ Bosh prokuratura vakili o‘z shikoyatini rasmiylashtirgani va bu voqea nazoratga olinganini bildirgan.