АҚШ Мудофаа вазири: Россия Македонияда ўтказиладиган референдумга аралашмоқда
“Улар пул сарфлаётганига шубҳа йўқ. Айни пайтда кенг миқёсда таъсир ўтказишга ҳам ҳаракат қилмоқдалар”, дер экан, АҚШ мудофаа вазири Россиянинг бу ҳаракатлари қанчалик самара бераётгани номаълум эканлигини айтди.
30 сентябрда Македонияда мамлакат номини "Шимолий Македония"га ўзгартириш масаласи юзасидан референдум ўтказилиши кутилмоқда. Дастлабки сўров натижаларига қараганда, янги ном тарафдорлари кўпчиликни ташкил қилмоқда. Македонияда 1,8 млн сайловчи қайддан ўтган.
Грециянинг бир вилояти ҳам Македония деб аталиши туфайли, Афина келажакда ҳудудий ихтилоф чиқишининг олдини олиш мақсадида Македониядан ўз номини алмаштиришни талаб қилмоқда.
Македония билан Греция ўртасида июнда эришилган келишувга биноан, агар Македония ўз номини ўзгартирса, унинг НАТОга аъзо бўлиши учун йўл очилади. Москва эса, НАТОнинг кенгайишига қарши.