Эрон Ташқи ишлар вазири ядро келишуви муҳокамаси учун Хитойга борди

Эрон ташқи ишлар вазири Муҳаммад Жавод Зариф Хитой расмийлари билан Теҳрон ядровий дастурига оид келишувни муҳокама қилиш учун Пекинга борди.

Ўтган ҳафтада АҚШ президенти Дональд Трамп бу келишувдан АҚШ чиқишини эълон қилган эди.

Зариф Пекиндан кейин Москва ва Брюсселга ҳам боради.

Теҳрон ядровий дастури бўйича Эрон ва жаҳоннинг қудратли давлатлари ўртасидаги келишув 2015 йилда имзоланган.

Расмий номи “Қўшма тадбирлар мукаммал режаси” бўлган келишувни Хитой, Россия, Франция, Германия, Британия ҳамда АҚШ имзолаган эди.

Келишувда Эрон ядровий дастури чекланиши эвазига Теҳронга қарши киритилган иқтисодий санкцияларни бекор қилиш кўзда тутилган.

Президент Трамп шартнома Эронни етарлича жазоламаслигини айтиб, уни қоралаб келаётган эди. Ниҳоят, жорий йилнинг 8 майига келиб президент Вашингтон келишувдан чиқишини расман эълон қилди.