Rusiyeniñ raketa darbelerinden sebep 11 insan elâk oldı, Ukrayınanıñ dört vilâyetinde elektrik yoq – qurtarıcılar

Ukrayınanıñ fevqulâde vaziyetler devlet hızmeti bildirgenine köre, Rusiyeniñ Ukrayınağa qarşı açqan ateşi neticesinde 11 insan elâk oldı, 64 kişi yaralandı.

«Ateş neticesinde sekiz vilâyette ve Kyivde kritik infrastruktura obyektlerine (esasen energetik obyektler) ücüm etildi, 30-dan çoq yanğın çıqtı. Terror ücümi neticesinde 11 insan elâk oldı ve 64 kişi yaralandı. Dört vilâyette elektrik yoq: Lviv, Poltava, Sumı, Ternopil. Qalğan Ukrayına topraqlarında elektrik qısmen söndürildi», – dep aytıla Ukrayınanıñ fevqulâde vaziyetler devlet hızmetiniñ haberinde.

Ukrayınanıñ fevqulâde vaziyetler devlet hızmeti bildirgenine köre, yanğınlarnıñ söndürilüvine ve qazaiy-qurtaruv işlerine biñden çoq insan ve tahminen 120 dane tehnika celp etildi.

Oktâbrniñ 10-nda saba Rusiye ordusı Ukrayınağa bir çoq yerden ateş açtı. Ukrayına Silâlı quvetleri 43 raketa tüşürildi ve Rusiye Ukrayınağa qarşı 83 raketanı qullandı, dep bildirdi. Ukrayına arbiyleri 12 Shahed-136 İran uçucısızını tüşürdi.

Ukrayına prezidenti Volodımır Zelenskıynıñ aytqanına köre, Rusiye ordusınıñ eki nişanı bar – memleketniñ energetik obyektleri ve insanlar. Ukrayına baş naziri Denis Şmığal bildirgenine köre, Rusiyeniñ ücümleri neticesinde 8 regionda ve Kyivde 11 «müim infrastruktura obyekti» zarar kördi.

Rusiye prezidenti Vladimir Putin Ukrayınağa, hususan energetika obyektlerine ücüm etilgenini tasdıqladı. O, «Rusiye topraqlarında terakt ıntıluvları» devam etse, yañı ücümlernen qorquza.

Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.