Qırımğa Rusiye ordusına seferberlikni devam ettirmek «resmiy olmağan emir» keldi – «Krım SOS»
İşğal altındaki Qırımnıñ arbiy komissarlıqlarına Rusiye ordusına seferberlikni devam ettirmek «resmiy olmağan emir» keldi. Bu aqta «Krım SOS» aq qorçalayıcı teşkilâtı menbalarına esaslanıp bildire.
«İşğal altındaki Qırımnıñ arbiy komissarlıqlarına daa eñ az 2500 insannı seferber etmek emri resmiy olmağan şekilde berildi. Yarımadanıñ işğalci «ükümeti» plan yerine ketirilgenini aytsa da, mecburiy seferberlik devam ete», – dep tarif etti «Krım SOS» idaresiniñ reisi Oleksiy Tilnenko.
Sentâbrniñ 25-nde Qırımnıñ Rusiye yolbaşçısı Sergey Aksenov Telegram kanalında «künniñ soñuna qadar Qırımda seferberlik tedbirleri yekünlenecek», dep yazdı. Sentâbrniñ 26-nda o, Qırımda seferberlik «aman-aman bitti», dep yazdı, amma «bazı arbiy-esap zenaatlarda az sayıda insanlar alına».
Oktâbrniñ 1-nde Qırımnıñ Rusiye ükümeti seferberlik işi ve territorial mudafaa hızmetiniñ yolbaşçısı Viktor Fesenko Qırımda Rusiye qısmiy seferberligi planı yerine ketirile, dep bildirdi.
«Krıminform» Rusiye devlet agentligi Qırımnıñ seferberlik işi ve territorial mudafaa hızmetiniñ yolbaşçısı Viktor Fesenkonıñ malümatına esaslanıp, yarımadadan ketmege istegen qırımlılar yaşağan yerinde Rusiye arbiy komissarlıqlarından izin almalı, dep bildirdi.
Ukrayına istihbaratı Qırım.Aqiqatqa bildirgenine köre, Rusiye quvetçileri arbiy komissarlıqtan izin almağan erkeklerni işğal etilgen Qırımdan çıqarmay. Yarımadanıñ Rusiye akimiyeti «Qırımdan çıqmaq yasaq degil», amma «celpname alğanlar arbiy komissarlıqlarğa acele kelmeli», dep bildire.
Sentâbrniñ 21-nde Rusiyede qısmiy seferberlik ilân etilgen soñ Qırım ve Aqyarnıñ Rusiye akimiyeti askerlikke aluv komissiyalarını quruv aqqında bildirdi. Aq qorçalayıcılarnıñ malümatına köre, 5 biñden çoq qırımlı celpname aldı. Aqyarnıñ Rusiye akimiyeti yedekte olğan tahminen 2 biñ kişi Rusiyege ant etti, dep bildirdi.
Ukrayına prezidentiniñ Qırım Muhtar Cumhuriyetindeki daimiy temsilcisi Tamila Taşeva Qırımda arbiy komissarlıqlar qırımtatarlar toplu yaşağan yerlerde kütleviy şekilde celpnameler bere, dep bildirdi. «Krım SOS» aq qorçalayıcı teşkilâtı qırımtatarlarnıñ seferberligi olarnıñ genotsidine yol aça bile, dep bildirdi.
Ukrayına prezidentiniñ Qırım Muhtar Cumhuriyetindeki temsilciligi Rusiye seferberligine oğrağan qırımlılar içün areket algoritmini derc etti. Rusiye ordusına çağırılmaqtan qurtulmağa istegenler içün «canlı destek» açıldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.