Aqmescit SİZO-sında Ukrayinanıñ Rusiye ordusı tarafından işğal etilgen topraqlarından olğan mabüsler içün yer boşatalar – Yesipenko
Aqmescitniñ SİZO-larında Ukrayina qıtasınıñ Rusiye ordusı tarafından işğal etilgen topraqlarından olğan mabüsler içün yer boşatalar. Bunı Rusiye işğal etken Qırımda apis cezasına mahküm etilgen Qırım.Aqiqat frilanseri Vladislav Yesipenko aytıp berdi, dep haber ete advokat Nikolay Polozov.
Polozovnıñ sözlerine köre, Yesipenko ile Nariman Celâl ve ağa-qardan Asan ve Aziz Ametovlar laf etip olğanlar.
"Vladislavnıñ sözlerine köre, "monastırda" (qadınlar tutulğan SİZO korpusında) muvaqqat işğal etilgen Ukrayina topraqlarından, hususan Herson, Zaoprijjâ ve Donetsk vilâyetlerinden yañı mabüsler içün yer boşatmaq maqsadınen bir qat boşatıla", - dep aytıp berdi Polozov.
Bu malümatnı tasdıqlağan daa bir menba şimdilk yoq.
Rusiyeniñ nezaretinde olğan Aqmescit rayon mahkemesi Qırım.Aqiqat frilanseri (Azatlıq Raziosınıñ leyhası) Vladislav Yesipenkoğa üküm çıqardı. Rusiyeli mahkemeci Dlâver Berberov jurnalistni 6 yıl sert apis cezasına ve 110 biñ para cezasına mahküm etti. Evel qabaatlav tarafı Yesipenko içün 11 yıl apis cezasını istegen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.