Bağçasarayda Dudakovnıñ davası baqılğan mahkeme binası yanında kelgenlerni yaqalap başladılar
Qırımtatr Milliy Qurultayınıñ delegatı Edem Dudakovnıñ memuriy uquq bozma aqqında qararı baqılğan Bağçasaray rayon mahkemesi binasına Rusiye gvardiyasınen yük maşnası kelgen. Bunı Qırım.Aqiqat mühbiri haber ete.
Onıñ sözlerine köre, polis hadimleri mahkeme binası yanında toplaşqanlarğa toplanmaqnıñ qabul etilmemezligi aqqında tenbi oquğan ve soñra yaqalamalarnı başlağan.
"Qırım birdemligi" cemaat birleşmesiniñ malümatına köre, quvetçiler artıq 15 kişini yaqalağan.
Mühbirniñ malümatına köre, Dudakovnı mahkeme binasına 40 daqqa keçikme ile ketirgenler. Mahkeme zalına diñleyicilerni yibermegenler.
Şimdiki vaqıtta mahkeme mesleatlaşuv odasındadır.
Tintüv aqqında Qırımtatar Milliy Meclisiniñ reisi Refat Çubarov bildirdi. Onıñ aytqanına köre, «Dudakov – Bağçasasaraydaki Han sarayınıñ rus işğalcileri tarafından yoq etilüvi aqqında qorqmayıp aytqanlardan biridir».
Faallerniñ bildirgenine köre, tintüv Ekstremizm ile küreş merkeziniñ hadimleri tarafından keçirile, Dudakovnı ise kelgen advokatlarınen körüştirmeyler.
Advokat Edem Semedlâyevniñ aytqanına köre, tintüvden soñ Dudakov Bağçasaray polis bölügine ketirildi, lâkin onı müvekkiline kirsetmediler.
Advokat Emine Avamilevanıñ aytqanına köre, «tintüv sebebi 2017 senesi içtimaiy ağlarnıñ qullanıcısınıñ yazğanları altında Edem Dudakovnıñ ekstremist izaatı olğan eken».