Kuleba Qırım sebebinden Rusiyege qarşı sanktsiyalarnıñ devam etmesi içün Türkiyege minnetdarlığını bildirdi

Ukraina Tış İşler Naziri Dmıtro Kuleba, Türkiye akimiyetini Qırım sebebinden Rusiyege qarşı sanktsiyalar rejiminiñ saqlaması içün minnetdarlığını bildirdi. Bunı o Türkiye zenaatdaşı Mevlüt Çuvaşoğlu ile keçirilgen matbuat konferentsiyasında ayttı.

"Ukrainanıñ territorial bütünligine qol tutqanı içün, Qırım boyunca printsipial fikri içün Türkiyege minnetdarmız. Hususan, qanunsız işğal etilgen yarımadağa qarşı sanktsiya rejimini devam etmesi içün", - dedi Kuleba.

Mevlüt Çavuşoğlu da, Kyiv ve Anqara strategik işbirliklerini devam etecegi aqqında ayttı.

İyül 3-ünde Antaliyada Ukraina Tış İşler Naziri Dmıtro Kuleba ve onıñ Türkiye zenaatdaşı Mevlüt Çuvaşoğlu, Qırımda qırımtatarlarnıñ aqlarınıñ bozulmasını ve ukrain siyasiy mabüslerniñ azat etilmesini muzakere etti.

İyünde Ukraina prezidenti Volodımır Zelenskıy ve Türkiye prezidenti Recep Tayyip Erdoğan, Herson vilâyetinde qırımtatar qorantaları içün meskenlerniñ qurmasını muzakere etti.

Fevralniñ 3-nde resmiy körüşüv vaqtında Ukraina prezidenti Türkiye prezidentinen Rusiye işğal etken Qırımda insan aqları bozuv ve siyasiy mabüs qırımtatarlarnıñ azat etilüvinde yardım meselelerini muzakere etti.

Zelenskıynen körüşken Türkiye prezidenti Ankara Qırımnıñ qanunsız ilhaqını qabul etmeycek ve Ukraina topraq bütünligine qoltuta, dep bildirdi.

Ukraina prezidenti Volodımır Zelenskıy 2019 senesi avgustnıñ 7-nde Türkiye prezidenti Recep Tayyip Erdoğannen Ankarada muzakere keçirgen edi. Olar Donbastaki cenk, Qırım ilhaqı ve yarımadada qırımtatarlarnıñ taqip etilüvi, em de iqtisadiy işbirligi ve yol ve ava limanlarını beraber quruv aqqında laf etti.