ATR telekanalı, Avropa parlamentinden ve Avropa komissiyasından maddiy yardım istey

ATR qırımtatar telekanalı Avropa parlamenti ve Avropa komissiyasına muracaat etip, maddiy yardım kösterilmesini rica etti. Telekanal bu muracaatını fevralniñ 24-nde derc etti.

«Avropa parlamenti, 2016 senesi fevralniñ 4-nde tasdıqlanğan «Qırımda insan aqlarına, hususan qırımtatarlarnıñ aqlarına riayet etüv vaziyetine dair» qararında kütleviy haber vastalarınıñ, hususan qırımtatarlar keniş baqqan ATR telekanalınıñ, qanunsız qapatıluvını takbih etip, Avropa komissiyasını bu ve diger kütleviy haber vastalarınıñ Ukrainada ğurbetlikte işini temin etmek içün kerekli maddiy yardımnı kenişletmesine çağırdı», – dep aytıla muracaatta.

Telekanal hadimleri «bugünki künde Avropa birliginiñ institutları tarafından böyle maddiy yardımğa pek muhtac olğanlarını» bildirdi, çünki ATR qapanmaq üzere ve yaqın vaqıtta Ukraina devletinden yardım alacağınen bağlı ümütni coya. 

Fevralniñ 10-nda ATR qırımtatar telekanalı esapları blok etildi, dep bildirdi. Şu sebepten telekanal alıp barıcı ve musafirler olmağan yayınlarnen #SaveATR marafonını başlattı.

Ukraina medeniyet, gençlik ve sport naziri Volodımır Borodânskıy ATR qırımtatar telekanalını qapatuv telükesi bar olğanını inkâr ete. Onıñ aytqanına köre, telekanal çalışa, şu sebepten «qapanmaq üzere olğanını aytmağa kerekmey». Borodânskıynıñ aytqanına köre, 2020 senesi ATR içün 50 mln ğrn belgilendi, nazirlik 8,4 mln ğrn tahsis etti.

ATR Ukrainadan sürgün etilgen qırımtatarlar ve diger millet insanlarını yerleştirüv bücet programmasına köre 2016 senesinden berli devlet bücetinden maddiy yardım ala. 

2015 senesi aprelniñ 1-nde ATR Rusiye litsenziyasını alamayıp, işğal etilgen Qırımda yayınlarını toqtattı. Yayınlar 2015 senesi iyünniñ 17-nde yañıdan başladı – telekanal Kyivge köçti.