Ukraina uquq qoruyıcıları 40-tan çoq qırımlını tuta – Opanasük
Rusiye kontrolindeki işğal etilgen Qırımnıñ insan aqları vekâletlisi Larisa Opanasükniñ bildirgenine köre, Ukraina uquq qoruyıcıları 41 qırımlını apiste tuta. Bu malümatnı o, yanvarniñ 17-nde yarımadada keçirilgen «ekspertler şurası» toplaşuvında seslendirdi, dep bildire «RİA Novosti Krım».
«Resmiy malümat alıp olamaymız, şunıñ içün kütleviy haber vastalarından ya da sıñırda ya da Ukrainada yaqalanğanlarnıñ tuvğanlarından muracaatlar kelgen soñ malümat aldıq. Umumen yaqalanğanlar cedvelinde 41 insan bar. Olarnıñ arasında büyük apis cezalarına üküm etilgenler bar – 12-15 yıl», – dep ayttı Opanasük.
Diger menbalar bu malümatnı daa tasdıqlamadı. Ukraina uquq qoruyıcı müessiseleri de şimdilik cevap bermedi.
Opanasük, ad ve soyadlarını aytmay, amma Qırım ve Herson vilâyetiniñ memuriy sıñırında tutulğan aqyarlı İvan Antonovnıñ yaqalanmasını qayd ete. O, Hersonda «Qırım samooboronasında» iştirak etkeninden şübheli sayılıp yaqalandı. Opanasükniñ aytqanına köre, er adamnıñ qorantası Qırımnıñ Rusiye yolbaşçısı Sergey Aksenovdan yardım istedi.
Aqyarlı İvan Antonov yanvarniñ 8-nde «Çonğar» ukrain keçiş noqtasında memuriy sıñırdan keçmege tırışqanda yaqalandı. Ukraina telükesizlik hızmetiniñ malümatına köre, er adam 2014 senesi Aqyarda Ukraina Arbiy-deñiz quvetleri ştabını zapt etüvde iştirak etti. Yanvarniñ 9-nda Herson şeer mahkemesi şübhelini apiske aldı.
Antonovnıñ advokatı Oksana İlânda Qırım.Aqiqatqa izaat berip, imaye tarafı Herson şeer mahkemesiniñ Antonovnı sıñırlav tedbiri olaraq apiske almaq qararını şikâyet etecek, dep bildirdi.
Rusiye ombudsmeni Tatyana Moskalkova, Antonovnıñ yaqalanması ve apiske alınmasınen «pek qasevetlengenini» bildirdi.
Denisova, Rusiyede apiste tutulğan ukrainalı siyasiy mabüslerniñ farqlı sayısını aydınlatqan edi: 113-ten 115-ke qadar, olardan 80-den çoqu – qırımtatarlardır. Qırımtatar resurs merkeziniñ cedvelinde 86 qırımlı siyasiy mabüs bar.
Deñişimni beklegen qırımlılarnıñ ekseriyeti – qırımtatarlar, olar bir sıra davalarnıñ, hususan «Hizb ut-Tahrir», «Tebliğ Cemaatı» davalarınıñ (Rusiyede yasaqlanğan, amma Ukrainada yasağı olmağan teşkilâtlar) mabüsleri ola. Aq qorçalayıcılar ve advokatlar bu cinaiy davalarnı diniy sebeplerden taqip dep adlandıra. Bu davalarnıñ mabüsleri – din kütken musulmanlardır.
Qırım «samooboronası» yarımada işğali arfesinde peyda olıp, Rusiye işğaline yardım etti. 2014 senesi iyünniñ 11-nde Kreml kontrolindeki yarımada parlamenti qanun qabul etip, bu teşkilâtnı qanunlaştırdı.
Aq qorçalayıcılar bu silâlı birleşmeniñ bir çoq cinayetke alâqası bar, dep bildirgen edi. Mezkür cinayetlerniñ ekseriyeti Qırımda alâ daa tahqiq etilmedi.