Felemenkniñ Ukraina elçisi qırımlı advokat Lilâ Gemecige mukâfat berdi

Felemenkniñ Ukraina elçisi Yennes de Mol dekabrniñ 5-gde ukrainalı aq qorçalayıcılarğa «İnsan aqlarınıñ lâlesi» mukâfatını berdi. Birincisini – qırımlı advokat Lilâ Gemecige, ekincisi – odesalı ukrain faali Vitaliy Ustimenkoğa. 

Bu aqta Ukraina prezidentiniñ Qırım Muhtar Cumhuriyetindeki daimiy temsilciliginiñ Facebook saifesinde haber etile.

Qayd etilgenine köre, Lilâ Gemeci – «işğal etilgen Qırımda qırımtatarlarğa qarşı siyasiy sebeplerden açılğan esnaslarda iştirak etken» advokatlardan biridir. Aq qorçalayıcı faaliyeti sebebinden onı toqtatmaq talabınen bir çoq kere ihtar alğan edi».

«Qırımda olğan er bir dava şahsiy ağrım, şahsiy faciam ola. Bugün apiste olğan er bir insan içün küreşmek kerek olğanını añlaysıñ», – dep bildire aq qorçalayıcınıñ aytqanlarını müessise.

Lilâ Gemeciniñ qayd etkenine köre, bu mukâfat ilk evelâ bütün qırımlılarnen birdemlik timsali ola. Onıñ vastasınen bütün qırımlı advokat, aq qorçalayıcı, faal, «Qırım birdemliginiñ» vatandaş jurnalistleri qayd etildi.

Felemenk ükümeti Kremlniñ qırımlı siyasiy mabüsleriniñ imayecisi olğan işğal etilgen Qırım advokatı Lilâ Gemecini «İnsan aqları lâlesi» mukâfatına lâyıq kördi.

Lilâ Gemeci Bağçasaraydaki ekinci «Hizb ut-Tahrir davasınıñ» mabüsleriniñ ve vicdan mabüsi tanılğan «Qırım birdemligi» cemaat birleşmesiniñ koordinatorı Server Mustafayevniñ imayecisi ola. 

«İnsan aqları lâlesi» – Felemenk Tış işler nazirliginiñ teşebbüsiniñ tesis etilgen ükümet mukâfatıdır. 2008 senesinden berli insan aqlarına qoltutqan aq qorçalayıcı ve teşkilâtlarğa berile. 2018 senesinden itibaren Felemenk ükümeti bütün dünyada yapqan işi içün telükede olğan faal ve aq qorçalayıcılarğa yerli mukâfatlar bere.

«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.