Zelenskıynıñ ofisi qırımtatar sürgünliginen bağlı vesiqalarnı Mecliske berdi

Ukraina prezidenti ofisiniñ reber muavini Andriy Smirnov Qırımtatar Milliy Meclisiniñ azaları, 1944 senesi qırımtatar halqı genotsidiniñ aqibetlerini ögrengen Qırımtatar Milliy Qurultayı Komissiyası, qırımtatar gençleriniñ vekillerine 1944 qırımtatar sürgünliginen bağlı arhiv vesiqalarını berdi.

Bu aqta Meclis azası Gayana Yüksel Facebookta haber etti.

«Vesiqalar sürgünlik ketişatını, qırımtatarlarğa qarşı yapılğan işkencelerni aks ettire, tamır halqnıñ tuvğan toprağından Orta Asiya, Sibir ve Uralğa sürgün etilüvi boyunca mayıs tedbirleri nasıl keçirilgenini tarif ete», – dep yazdı Yüksel.

Onıñ aytqanına köre, XX asırnıñ Ukraina ve Qırım tarihınıñ tedqiqatı, totalitar sovet rejiminiñ vatandaşlarına qarşı cinayetlerini ögrenüv esnasında daa bir adım yapıldı.

«Bu vesiqalar ayrı akademik neşir olaraq basılmalı, ilmiy izaatlar, arhiv şifrleri, menba atıfları ve saqlav yerleri qayd etilmeli», – dep qayd etti Yüksel.

Ukraina Tış işler nazirligi 2019 senesi mayısta qırımtatar sürgünliginiñ 75 yılı munasebetinen beyanatnı aydınlatıp, dünya toplulığını qırımtatarlarnıñ 1944 senesi Qırımdan sürgün etilüvini qırımtatar halqınıñ genotsidi olaraq tanımasına çağırdı.

Mayısnıñ 18-de Ukraina ve dünyada 1944 senesinde qırımtatar halqınıñ Qırımdan sürgün etilmesi qurbanlarını hatırlaylar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.

Şu künü qırımtatarlar halqınıñ Qırımdan sürgün etilüviniñ qurbanları hatırasına çeşit añma tedbirleri keçirile.

Ukraina Yuqarı Radasınıñ qararına binaen, mayıs 18 künü Qırımtatar halqınıñ genotsidi qurbanlarınıñ hatıra künü dep ilân etildi.