Çubarov: Ukraina prezidentiniñ Qırım yañı daimiy vekiliniñ tayinlenmesi meselesinde Meclisnen aqıl tanışqan olmadı

Ukraina prezidenti Volodımır Zelenskıynıñ memuriyeti Ukraina prezidentiniñ Qırım Muhtar Cumhuriyetindeki daimiy vekili vazifesine Anton Korineviçni tayin etüv meselesinde Qırımtatar Milliy Meclisiniñ reisi Refat Çubarovnen aqıl tanışmadı. Bu aqta Çubarov iyünniñ 26-nda Qırım.Aqiqatqa tarif etti.

«Vekilniñ tayin etilüvini kütleviy haber vastalarından eşittim. Prezident memuriyetinden iç kimse bu mevzuda mennen, Qırımtatar Milliy Meclisiniñ reisinen, aqıl tanışmadı. Tayinlengen vekilni men, ne yazıq ki, tanımayım, şu sebepten onıñ faaliyetinden ne beklegenimni aytıp olamayım. Bundan evel çalışqan saada onıñ aqqında yahşı sesleneler, dep bilem», – dedi Çubarov. 

Meclis reisiniñ aytqanına köre, temsilcilik rolü Qırım meselelerinde müim rol oynay bile. 

«Qırım işğal altında olğanda daimiy temsilcilikniñ faaliyeti, temsilcilikniñ rolü pek yüksek olmalı, çünki Ukraina icra akimiyetiniñ Qırımnen bağlı meselelerde tam koordinatsiyası yoq. Böyle olacaqmı? Aytması qıyın», – dedi o. 

Qırım.Aqiqat prezidentniñ matbuat kâtibi Yuliya Mendel ile bağlanmağa tırıştı, lâkin haber derc etilgende tefsir daa yoq edi. 

İyünniñ 25-nde Ukraina prezidenti Volodımır Zelenskıy Anton Korineviçni Ukraina prezidentiniñ Qırım Muhtar Cumhuriyetindeki daimiy vekili vazifesine tayin etti.

Anton Korineviç – uquq ilimleri namzeti, dotsent, Taras Şevçenko Kyiv milliy universiteti Halqara munasebetler institutınıñ halqara uquq kafedrasınıñ dotsentidir. Qırım.Aqiqat Radiosınıñ yayınlarında iştirak etken edi.

Petro Poroşenko 2018 senesi dekabrniñ 2-nde Boris Babinni Ukraina prezidentiniñ Qırım Muhtar Cumhuriyetindeki daimiy vekili vazifesinden boşatuv fermanını imzaladı. Vesiqada aytılğanı kibi, Babin «bergen istifa arizası esasında» işten boşatıldı. Ukraina prezidentiniñ Qırımdaki daimiy vekiliniñ birinci muavini İzet Gdanov vazifelerini yapmağa devam etti.