Qırımtatar faali Bekirov 12 saat devamında aşsız ve tibbiy yardımsız oturışuv başlaycağını bekledi – advokat

Kreml kontrolindeki Aqmescit Kiyev rayon mahkemesi Cezalarnı yerine ketirüv federal hızmetiniñ hadimleri tarafından silâ ve patlayıcı maddelerni qanunsız saqlağanında qabaatlanğan qırımtatar faali Edem Bekirovğa kösterilgen munasebetinen bağlı ayrı qarar çıqardı. Qadı Anton Tsikurenko Bekirovnıñ 12 saat devamında aşsız ve tibbiy yardımsız oturışuv başlaycağını beklegenini teşkermek ve buña cevap bermek ricası ile prokuraturağa qararnı yolladı. Bu aqta Qırım.Aqiqat mühbiri haber ete. 


«Mahkeme alğan malümatqa köre, Bekirov saba saat 7-de kameradan çıqarıldı ve aqşamğa qadar bir şey qapmadı. Bekirovnıñ şeker hastalığı bar ve o, er 3 saat aşamaq kerek. Aqibetler pek kederli ola bile – diabetik komağa kirmesi mümkün», – dep ayttı advokat Aleksey Ladin.


Mahkeme konvoy yolbaşçısını sorğuğa çekti. CYKFH hadimi Bekirovğa quru aş berilmey, «çünki uzaqqa alıp ketirilmeycek», tuvğanlarından aş ve suv berilmesini içki emir yasaq ete, dep bildirdi.


«Biz acele yardım çağırılmasını da rica etken edik. Qadı Bekirovdan tibbiy yardımğa muhtacmı, dep soradı. Amma müvekkilim mahkeme oturışuvlarını boykot etecegini ve bir de bir suallerge cevap bermeycegini aytqan edi, şu sebepten tibbiy yardım kösterilmesi red etildi», – dedi Ladin.


Aqmescit mahkemesi Edem Bekirovnıñ apis cezasını daa eki ayğa uzattı. O, avgustnıñ 12-ne qadar SİZOda qalacaq.


Mayısnıñ 28-nde Bekirovnıñ advokatı İslâm Velilâyev müvekkilini Aqmescit SİZOsında ziyaret etip, sağlıq vaziyeti kritik fenalaşqanını bildirdi. Velilâyevniñ aytqanına köre, yürek, baş ağrıları, mide astı bezi problemleri, ayaqlarnıñ üyüşüvi, yüksek qan basımı ve yüksek qan şekerinden ğayrı, boğulmağa ve qannen öksürmege başladı.


Daa evel mayısta qırımtatar faali Edem Bekirov Aqmescitteki Semaşko hastahanesine teşkerüvge çıqarılğan edi.


Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.


Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.