FSB, Eski Qırımda tintüv keçirip, «Meclisnen bir bağ» tapmadı – advokat

Rusiye uquq qoruyıcıları Eski Qırım sakini, qırımtatar faali İsmet Memetovnıñ evinde tahqiqat tedbirlerini keçirip, bir şey tapmadı, dep bildirdi advokat Emil Kürbedinov Qırım.Aqiqatqa.

Noyabrniñ 21-nde tintüv «Meclis faaliyetinen alâqaları bar olğanına dair şübeler» sebebinden keçirildi.

«Neticede Qırımtatar Milliy Meclisiniñ faaliyetinen ya da ekstremist edebiyatınen bağlı bir şey alınmadı ve tapılmadı. Qarar bunıñ esasında yazılğan edi. Memetovnıñ Meclisni maliye etkenine dair malümat bar eken», – dedi Kürbedinov.

Advokatnıñ aytqanına köre, uquq qoruyıcılarnıñ bu areketleri Memetovnıñ vatandaş pozitsiyasınen bağlı. 

«Şimdilik advokatlarğa berilgen tenbilerge oşay. Memetov siyasiy mabüslerniñ mahkemelerine qatnağanınen, «Qırım birdemligini» ziyaret etip çıqışta bulunğanınen bellidir», – dep qoştı o.

Çarşenbe künü aqşam belli oldı ki, Rusiye FSBsi hadimleri Eski Qırım sakini, qırımtatar faali İsmet Memetovnıñ evinde keçirgen tintüvini bitirdi.

Şaatlarnıñ qayd etkenine köre, Rusiye FSBsi hadimleri keçirgen tintüv vaqtında evde 2-5 yaşlarında balalar bar edi. İsmet Memetovnıñ altı balası bar, dep qayd etti «Qırım birdemligi».

Qırımtatar Milliy Meclisiniñ reisi Refat Çubarov Qırım.Aqiqatqa izaat berip, İsmet Memetov ürmet qazanğan bir insan olğanını ayttı. Çubarov, «Meclis faaliyetinen alâqaları bar» kibi şübeler «tintüv keçirmek içün manaçıq» olğanını tüşüne.

Noyabrniñ 21-nde Rusiye FSBsi hadimleri Eski Qırım sakini, qırımtatar faali İsmet Memetovnıñ evinde tintüv keçire, dep bildire «Qırım birdemligi».

Memetov Rusiyede ve onıñ işğali altındaki Qırımda yasaqlanğan Qırımtatar Milliy Meclisiniñ faaliyetinen alâqaları bar olğanında şeklengen edi. FSB malümatına köre, Memetov Meclisni maliye ete ve «ekstremist edebiyatnı saqlay».

İsmet Memetov oña aydınlatılğan qabaatlarnen razı degil ve yapılğan basqınıñ siyasiy mabüslerniñ mahkemelerine faal qatnağanınen bağlı olğanını tüşüne.

Rusiye uquq qoruyıcıları Eski Qırımdaki tintüvlerni izaatlamay.

İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.