«Nezaketli ziyaret» nasıl keçti. Rusiye uquq qoruyıcıları «Qırım birdemliginiñ» toplaşuvında (video)

Aqmescitte oktâbrniñ 27-nde keçirilgen «Qırım birdemligi» cemaat teşebbüsiniñ toplaşuvına Rusiye prokuraturasınıñ hadimleri, kimligi belli olmağan maskalı insanlar ve politsiya hadimleri keldi. Qırım.Aqiqat mühbiriniñ bildirgenine köre, maskalı insanlar özüni tanıtmadı. Daa soñra ekstremizm ile küreş merkeziniñ hadimleri olğanı ögrenildi. Qırım.Aqiqat mühbiri bildirdi ki, prokuratura vekilleri «Qırım birdemliginiñ» koordinatorlarından biri, Bağçasaraydaki «Hizb ut-Tahrir davasınıñ» mabüslerinden biriniñ oğlu Dilâver Memetov ve qırımlı uquqçı Lilâ Gemecige keldi. Uquq qoruyıcılarnıñ aytqanına köre, «olarnıñ Gemeci ve Memetov teşkil etecek bir kişilik narazılıqlar aqqında malümatları» bar. Rusiye uquq qoruyıcıları «Qırım birdemliginiñ» toplaşuvına ilk sefer kelmey. 2018 senesi yanvarniñ 27-nde de toplaşuvğa Rusiyeniñ OMON hadimleri kelgen edi. Uquq qoruyıcılarnıñ aytqanına köre, olarğa telefon etip, «bu adres boyunca silâlı toplaşuv keçirilgenini» haber etkenler.